Ҳабиб Баҳриддинов натанҳо стендаперӣ, ҳамчунин филмноманависӣ низ мекунад, ки филми ҳаҷвии «Метро 2067» яке аз онҳост.
То кунун 7 қисми филми ҳаҷвии «Метро 2067»-и ӯ пешниҳоди мардум гардида, ҳоло барои як филми ҳаҷвии дигар сенария менависад ва банаворгирии филм соли 2022 дар шаҳри Душанбе оғоз мешавад.
Ҳабиб Баҳриддинови 27-сола аз ҷавонтарин ҳаҷвнигорони тоҷик аст, ки ба жанри мураккаби стендап рӯй овардааст. Намоиши нахусти худро ӯ зери унвони «Битон гап мӯл» соли 2019 пешниҳоди ҳаводорон намудааст. Ҳабиб Донишгоҳи техникиро бо ихтисоси муҳандис — барномасоз хатм кардааст.
Чанд муддат муаллими фанҳои дақиқ буд, ҳоло дар Оҷонсии «Пурнур», ба сифати директори тиҷоратӣ ва коргардон кор мекунад.
Ҳабиб Баҳриддинов, инчунин аъзои лоиҳаи ҳаҷвии «ТЮ» низ ҳаст.
“Навиштани сенария дар жанри стендап кори осон нест. Тасавур кунед, ки ҳар дар як дақиқа, ҳар 15-20 сония бо суханҳои ҳаҷвӣ бояд мардумро хушҳол кунед. 80-85 фоизи сенарияҳои ҳаҷвӣ барои монологҳоро худам менависам, ки аксарияташон писанди мардум мегардад.”, — мегӯяд Ҳабиб Баҳриддинов.
Вале дар қадами аввали фаъолият ҳаҷви ӯ ба мардум он қадар писанд набуд. Ҳунарнамоияш дар намоишномаи «Toqi» маҳбубияти ӯро афзун кард.
Мавзӯҳоии стендапи Ҳабиб мушкилоти доғи рӯзанд. Дар шабакаҳои иҷтимоӣ низ мардум стендапҳои ӯро хуб қабул мекунанд.
Ҳабиб Баҳриддинов талош дорад, ки минбаъд дар монологҳои худ аз гӯишҳои маҳаллӣ истифода накунад то нутқаш ба ҳама фаҳмо бошад.
М. Маҳкамзода
