Даври дуюми Чемпионати Тоҷикистон-2022 байни дастаҳои лигаи олӣ ба охир расид ва ширкаткунандагон дар ду гурӯҳи марҳилаи дуввум муайян гардид.
Акнун дар марҳилаи дуюми чемпионати Тоҷикистон дастаҳо ба ду гурӯҳ тақсим мешаванд. Аз рӯи натоиҷи марҳилаи аввал панҷ тими беҳтарин дар гурӯҳи “А” дар як давр бозӣ карда, дар ҷадвали мусобиқот ҷойҳои аз 1 то 5-умро ишғол мекунанд. Инҳо «Истиқлол» (Душанбе), «Хатлон» (Бохтар), «Равшан» (Кӯлоб), «Хуҷанд» (Хуҷанд) ва ССКА (Душанбе) мебошанд.
Ба иттилои Федератсияи футболи Тоҷикистон, панҷ тими дигар – «Истаравшан» (Истаравшан), «Файзканд» (Восеъ), «Эсхата» (Хуҷанд), «Равшан» (Зафаробод) ва «Регар-ТадАЗ» (Турсунзода) дар гурӯҳи «В» дар як давр бозӣ карда, барои ҷойҳои аз 6 то 10-ум мубориза мебаранд. Дар маҷмӯъ ҳар даста дар чемпионати Тоҷикистон-2022-ум 22 бозӣ анҷом медиҳад.
