Узви дастаи мунтахаби гуштини юнонӣ-римии Тоҷикистон Фирӯз Мирзораҷабов дар Чемпионати Осиё миёни ҷавонон сазовори медали биринҷӣ шуд.
Чемпионати Осиё оид ба гуштин миёни наврасон ва ҷавонон 2-юми июл дар шаҳри Манамаи Баҳрайн оғоз гардида то 10-уми июл идома мекунад.
«Фирӯз дар вазни -60 кг қувваозмоиро аз чорякфинал оғоз карда, бар варзишгари Узбекистон Акмал Ҳамроев ғолиб омад, вале дар нимфинал аз намояндаи Қирғизистон Оқил Сулаймонов мағлуб гардид. Ӯ сипас дар қувваозмоӣ барои ҷои сеюм варзишгари Тайпейи Чин Йонг Сианг Суро шикаст дода, ҷои сеюми ифтихориро сазовор шудааст.»,-хабар медиҳад Кумитаи олимпии кишвар.
Варзишгари дигарамон дар ин равия Шероз Очилов дар вазни -72кг дар чорякфинал аз намояндаи Кореяи Ҷанубӣ Минсео Оҳ мағлуб гардида, аз идомаи сабқатҳо маҳрум шуд.
Чемпионати Осиё миёни ҷавонон то 20-сола бо қувваозмоиҳо миёни бонувон ва писарон дар гуштини тарзи озод идома меёбад. Миёни писарон як варзишгари мо — Саидасан Ашрафхонов 10-уми июл дар вазни -74кг гуштин мегирад.
