Мурсал Беки 18-сола чеҳранигори муваффақ аст. Ӯ шаҳрванди Афғонистон буда, соли чаҳорум аст, ки дар шаҳри Ваҳдат зиндагӣ мекунад.
Мурсал дар 14-солагӣ ҳамроҳ бо волидонаш аз Афғонистон ба Тоҷикистон паноҳ овард ва дар инҷо рӯзҳоро бо рассомӣ пушти сар мекунад. Дар жанри чеҳранигорӣ ҳунарашро сайқал медиҳад ва то кунун чеҳраи беш аз 30 шахсияти шинохтаро тасвир намудааст. Тасвири овозхони саршиноси амрикоӣ Райҳонна (Рианна) намунае аз кори ӯст.
“Ҳунари рассомӣ бахшҳои мухталиф дорад. Инҷониб ба чеҳранигорӣ алоқаи хос дорам ва дар ин ришта зеботар метавонам рассомӣ кунам.”, — мегӯяд Мурсал.
Ин рассоми ҷавон ҳунари худро назди як рассоми афғон, ки дар Тоҷикистон паноҳанда аст, такмил медиҳад ва моҳи сеюм аст, ки ӯ ба мактаби рассомии Умар Хомӯш, рассом ва муҷассамасози шинохтаи Афғонистон меравад.
Умар Хомӯш соли 2021 бо аҳли оилааш ба Тоҷикистон омада, дар шаҳри Ваҳдат дукони рассомии худро боз карда, дар онҷо ба ҳавасмандон рассомиро меомӯзонад…
Тасовири Мурсал моҳи май дар намоишгоҳи расмҳо, ки дар ҳошияи Конфронси озодии сухан дар меҳмонхонаи «Ҳайёт Реҷенсӣ»-и Душанбе доир гардид, ба намоиш гузошта шуд.
Мурсал ҷоизадори озмунҳои гуногуни рассомӣ низ мебошад ва ҳанӯз 9 сол дошт, ки дар мусобиқаи рассомии телевизиони “Ориёно”-и Афғонистон ширкат варзида, соҳиби мақоми аввал гардид.
Рассоми ҷавон дар Tik-Tok ва Instagram намунаи кори хешро ба иштирок мегузорад:
“Ҳар гоҳ расмҳои худро дар шабакаҳои иҷтимоӣ нашр мекунам, корбарони зиёде маро тавсифу ташвиқ мекунанд. Вақте шарҳҳои мусбати дӯстону обуначиёнро мебинам, энержии мусбат мегирам ва мекӯшам бештару беҳтар рассомиву наққошӣ кунам.”
Мурсал донандаи забонҳои инглисӣ ва фаронсавӣ буда, мехоҳад дар Фаронса ё Канада зиндагӣ намояд ва рассоми ҳирфаӣ гардад.
Ардашери Пайванд
