Ютуб розӣ шуд, ки барои бастани ҳисоб ё аккаунти Доналд Трамп 24,5 миллион доллар ҷуброн пардохт кунад. Шабакаи мазкур маблағро барои ҳаллу фасли даъвои судии президенти ИМА вобаста ба муваққатан маҳдуд кардани аккаунти ӯ дар соли 2021 ҷудо намудааст.
Аз ин маблағ 22 миллион доллар ба созмони Trust for the National Mall, ки масъули сохтмони яке аз толорҳо дар Қасри Сафед мебошад, равона мешавад. Қисми боқимонда байни даъвогарони дигар тақсим карда мешавад.
Дар моҳи январ Meta Platforms барои парвандаи бастани ҳисоби Трамп дар Facebook 25 миллион доллар пардохт кард. Ширкати X низ бо ӯ оид ба даъво нисбат ба Twitter бо маблағи 10 миллион доллар созиш кард.
Аккаунтҳои Трамп дар Facebook, Instagram, YouTube ва Twitter баъд аз ҳодисаҳои 6 январи соли 2021, вақте ки ҷонибдоронаш ба нишони норозигӣ аз натиҷаҳои интихоботи президентӣ ба бинои Конгресс (Капитолий) ворид шуданд, баста шуданд. Роҳбарияти шабакаҳои иҷтимоӣ изҳор дошт, ки Трамп бо изҳороташ метавонад ба хушунат таҳрик диҳад.
