Дар маҳфили фарҳангии тоҷикону афғонҳо Ҷон Марк Помершайм, сафири ИМА дар Душанбе, Вайн Зин, роҳбари корҳои байналмилалии Ташкилоти ҷамъиятии «Spirit of America» ва Мирзо Исмоилзода, раиси шаҳри Ваҳдат ширкат карданд.
Чорабинии мазкур дар Маркази эҷодии кӯдакону наврасони шаҳри Ваҳдат баргузор гардида, беш аз 100 толибилми тоҷику афғон ба ҳам омаданд.
Феълан беш аз 500 толибилм аз ҳисоби гурезагони афғон дар шаҳри Ваҳдат иқомат мекунанд. Ташкилоти ҷамъиятии «Spirit of America» дар ҳамкорӣ бо сафорати Амрико дар Душанбе, мақомоти маҳаллӣ дар шаҳри Ваҳдат ва дигар созмонҳои ҷамъиятӣ барои соҳибилм шудани наврасони афғон кумак мекунанд.
Сафири ИМА зимни суханронии хеш иброз дошт, ки дар оянда низ барои ҷалби паноҳҷӯёни афғон дасти ёрӣ дароз мекунанд.
Масъули равобити байналмилалии Ташкилоти ҷамъиятии «Spirit of America» Вайн Зин аз дастгириву ҳамкории сафорати ИМА ва мақомоти маҳаллии шаҳри Ваҳдат сипосгузорӣ карда, ҳамзамон, қайд кард, ки ташкилоти «Spirit of America» барои кумаки паноҳҷӯён боз 100 ҳазор доллар кумак мекунад.
Ташкилоти мазкур охири соли гузашта идомаи фаъолияти мактаби Сомониён, ки дар он донишомӯзони афғон таҳсил мекунанд 80 ҳазор доллар дода буд.
Довуд Акобиров
