Арзиши бозории Ширкати «Apple» аввали сол 3 триллион долларро ташкил медод, аммо айни ҳол қимати саҳмияҳои он поин рафта, бахусус, коҳишёбӣ дар вақтҳои охир шиддат гирифтааст. Дар натиҷа, Apple унвони гаронарзиштарин ширкати сайёраро аз даст дода, Saudi Aramco аз ин ширкат пеш гузашт.
Бино ба гузориши Bloomberg, арзиши бозории ширкати миллии нафтии «Saudi Aramco» 2,43 триллион доллар ва Apple 2,41 триллион долларро ташкил додааст. Оҷонсии «Bloomberg» поинравии қимати саҳмияҳои ширкатҳои технологӣ, аз ҷумла Apple-ро дар соли 2022 ба нигарониҳо аз таваррум ва сиёсати хашмгиронаи Хазинаи федералии ИМА марбут медонад. Маҳдудиятҳои занҷири таъминот низ нақши муҳим бозиданд. Ҳамзамон, арзиши коғазҳои қиматноки Saudi Aramco дар соли 2022 бо сабаби болоравии нархи нафт қариб 30% боло рафт.
