Илҳом Дониёров «Tiko»-и хешро ба электромобил табдил дода, харҷи мошинро дар 100 км аз 60 сомонӣ ба 4 сомонӣ расонид. Ӯ барои табдили нақлиёти хеш ба электромобил 25 ҳазор сомонӣ харҷ намудааст.
Илҳом дар корҳои хоҷагӣ аз мошин зиёд истифода мекунад. Баланд шудани нархи сӯзишворӣ ӯро водор намуд, ки мошини худро барқӣ намояд. Моҳи январи соли равон мошини тамғаи “Тико”-яшро, ки 10 ҳазор арзиш дорад, акмулятор насб намуда ба электромобил табдил дод.
Насби акмулятори барқӣ 1 моҳ тӯл кашид. Илҳом қисмҳои эҳтиётие, ки барои мошини бо сӯзишворӣ ҳаракаткунанда лозим буд, ҳамаро берун карда, аз вазни мошинаш ҳудуди 250 кг кам кард.
Барои пур кардани акумлятор бо нерӯи барқ 4 соат вақт лозим меояд ва баъд аз ин мошин метавонад 100 км роҳро тай намояд. «Tiko»-и Илҳом дигар фазоро ифлос намекунад ва бидуни садо ҳаракат мекунад.
Илҳом сокини шаҳри Турсунзода мебошад. Ҳоло ба корҳои кишоварзӣ машғул буда, дар хоҷагии деҳқонии “Муродҷон ота” ба парвариши дарахти чормағз машғул аст.
Илҳом қаблан устои таҷҳизоти маишӣ буд:
“То соли 2018 ман ба таъмири кондитсионер, яхдон ва ашёҳои дигари маишӣ машғул будам. Аз замони таъсиси хоҷагии деҳқонии “Муродҷон ота” ба боғдорӣ пардохтам.”,-нақл намуд Илҳом Дониёров.
Илҳом дар мошинҳои боркаш низ акмулятор насб карданист то боркашониро дар хоҷагӣ камхарҷу осон намояд.
Маҳкамзода Маҳкам
