Ба ниҳодҳои давлатии марказии Чин дастур дода шудааст, ки iPhone ва дигар дастгоҳҳои тамғаи хориҷиро бо ҳадафҳои корӣ манъ намоянд. Дар ин бора рӯзномаи The Wall Street Journal хабар додааст.
Манъи истифодаи смартфонҳои хориҷӣ тавассути чатҳои корӣ, эълонҳо ва ҷаласаҳои вижа ба таваҷҷӯҳи хизматчиёни давлатӣ расонида шуд. Ғайр аз ин, ба онҳо на танҳо дар ҷои кор истифода бурдани дастгоҳҳо, балки ба идора овардан ҳам манъ гардид. Қаблан ин гуна маҳдудиятҳо дар бархе аз ниҳодҳо ва идораҳо ҷорӣ буд, ҳоло ба «доираи васеъ»-и мансабдорон дахл дорад. Чин инчунин барои муддати тӯлонӣ таҷҳизоти компютерӣ ва нармафзори истеҳсолкунандагони хориҷиро бо ватанӣ иваз карданист
Чунин чораҳо метавонанд ба тиҷорати Apple Corporation, ки дар бозори смартфонҳои баландсифати Чин пешсаф аст, таъсири манфӣ гузорад.
Соли 2019 ИМА ширкати бузурги истеҳсолкунандаи смартфони чинии Huawei-ро ба далели таҳдид ба амнияти миллӣ ба рӯйхати сиёҳ ворид кард. Иёлоти Муттаҳида ҳамчунин ба ниҳодҳои давлатии худ харидорӣ ва истифодаи таҷҳизоти телекоммуникатсионӣ аз ширкатҳои чинии ZTE, Hytera Communications Corporation, Hangzhou Hikvision Digital Technology ва Dahua Technology-ро манъ карда буд.
