Шерзод Исломов то соли 2016 дар ноҳияи Ғончӣ (Деваштич) дар баробари дигар бачаҳои деҳа ба корҳои хоҷагӣ ва таҳсил андармон буд. Сипас ба пойтахти кишвар омада пайи худсозӣ гардид:
— Баробари ба Душанбе омаданам хоҳиши раққос шудан дар замирам пайдо шуд, вале аз атрофиён шарм медоштам, чун дар ҷомеаи мо ба ин навъи санъат машғул шудани ҷавонписаронро на ҳама хуб қабул мекунанд. Қисса кӯтоҳ, рафта-рафта бо ёрии устодам Максим Александров муддати як сол рақсро омӯхтам ва бо роҳнамоии эшон ба омӯзонидани дигарон пардохтам.
Шерзод пинҳон намекунад, ки чанд сол қабл барои беҳтар кардани рӯзғори хеш нияти ба хориҷи кишвар рафтанро дошт, вале баъди омӯзишу худсозӣ шод аст, ки кишварро тарк накард. Ба таъкиди ӯ, кишвари мо барои худсозӣ мусоид аст ва ҳар кас бо кушиши заҳмат ҳатман ба мақсад мерасад.
Шерзод ҳоло рақс мекунад ва ба дигарон меомӯзонад. Дар мактаб муаллими рақс аст. Ду сол дар Студияи театри мусиқӣ-драмавии ба номи Маяковский актёриро омӯхтааст. Ҳамчунин акс мегирад ва мудели акс ҳам аст.
Ибтидо атрофиён, хешу ақрабо ба раққос шудани Шерзод назари нек надоштанд ва ҳоло ӯро дарк мекунанд…
Кори асосии Шерзод омӯзонидани рақс аст. Ӯдар мактаби Сontofield International School ба синфҳои 1 то 11 дарс мегӯяд ва ҳамчунин дар студия:
— Ман дар мактаби умумӣ дарс медиҳам, вале дар студия шогирдонро, ки синну солашон гуногун аст, мувофиқи табъу завқӣ худашон. Бачаҳо дар мактаб 11 сол мехонанд, вале дар студия агар ҳар нафаре, ки маро бодиққат гӯш кунад ва вазифаҳоро иҷро намояд, муддати 3-4 моҳ рақсро меомӯзад.
Шерзод анвои гуногуни рақсро меомӯзонад. Ба бовари ӯ, бояд ибтидо гӯш кардани мусиқиро омӯхт, сипас рақсро новобаста аз жанр.
Қаҳрамони мо мегӯяд, ҳоло мехоҳад дигар ҳунарҳоро дар замираш сайқал диҳад: мусиқинависӣ, овозхонӣ, кор дар театр ва ғайра.
Ҳ. Тоҳирӣ
