Ҳакималӣ Камолов ягона сангтарош дар вилояти Хатлон маҳсуб ёфта, ӯ олоти муосири сангтарошӣ надорад ва бо асбобе кор мекунад, ки ҳама хонаводаҳо онро доранд. Ҳакималӣ дар кораш ҳамагӣ 3 асбоб-болғаю искана ва баргалка истифода мекунад.
Агарчи сангтароширо бо худомӯзӣ аз худ кард, вале ҳоло маҳсули дасташ ба хориҷи кишвар расидааст. Офаридаҳояш аз сангҳои оддӣ ҳастанд, вале зоҳиран зебо буда, барои гирифтани ширинӣ ва меваю донагӣ истифода мешавад.
Соҷида Камолова ҳамсари Ҳакималӣ Камолов ба шавҳараш кумак мерасонад. Соҷида тахайюлоташро рӯйи коғаз ва сипас рӯйи санг оварда, кори баъдиро ба шавҳараш вогузор мекунад.
Онҳо соҳиби 4 фарзанд-3 духтар ва 1 писар буда, феълан писараш дар муҳоҷирати меҳнатӣ аст. Сангтарошӣ низ як манбаи даромади хонавода маҳсуб мешавад.
Ҳакималӣ Камолов мегӯяд, офаридаҳояшро мардум ҳамчун армуғон харидорӣ мекунанд. Баъзе аз зарфҳои сохтааш аллакай дастурхони сокинони деҳаро оро медиҳад.
“Мо имкони сохтани як дуконро надорем, рӯзҳои офтобӣ дар ҳавлӣ корамро пеш мебарам. Талабот ба ин касб зиёд аст. Агар шароити корӣ фароҳам орам, алоқамандонро низ метавонам ба омӯзиш фаро гирам.”,- мегӯяд Ҳ. Камолов.
Ҳакималӣ сангҳои зиёдеро дар ҳавлии хеш захира кардааст. Ҳар санге шаклан барои сохтани ашё ё зарфе мувофиқ аст, ҷамъоварӣ ва коркард мешавад.
Ҳоло ин хонавода мехоҳад расонаӣ шавад то сарпарасет барои сохтани дуконба онҳо дасти ёрӣ дароз намояд.
Амонҷон Муҳиддинов
