Форуми рестораторон дар Душанбе 21 декабр ба поён расид. Масоили тарабхонадорӣ, пешниҳоди хизматрасонии босифату ҷавобгӯ ба стандартҳо мавзӯҳои калидии форум буд.
Чорабиниро Маҳиноз ва Азиз ду ҷавони тоҷик ташкил намудаанд ва мегӯянд, ҳадафашон фароҳам овардани имконият барои ҳалли баъзе масоили вобаста ба баланд бардоштани сифати хизматрасонӣ дар сегменти тарабхонаҳо мебошад.
Шиори “Хизматрасонии босифати тарабхонаҳо дар Тоҷикистон: дирӯз, имрӯз ва фардо” буд ва чандин мутахассиси ботаҷрибаи сатҳи ҷумҳуриявию байналмилалӣ дар ин форум аз таҷрибаи худ нақл карданд.
Камолиддин Муминзод, ноиби раиси Кумитаи рушди сайёҳии назди Ҳукумати Тоҷикистон аз дасгирии давлатӣ дар соҳаи туризм, меҳмонхонаву тарабхонадорӣ гуфт.
Орхан Алакбаров, менеҷери генералии меҳмонхонаи 5-ситорадори “Ҳаят Риҷенси Душанбе” бобати фаъолияти ин меҳмонхона ва кору пайкори хеш ба иштирокчиёни форум қисса кард, ки чӣ гуна аз кори пешхизматӣ то ба ин маснад расид.
Тоҷидин Ҷалолов, директори Тарабхонаи туркии “Саид Эфандӣ” аз чӣ шурӯъ кардани тарабхона ва кор бо ҳайати кормандон нақл кард.
Тулкин Ҷабборов сарошпази сатҳи байналмиллалӣ дар бораи нақши сарошпаз, кор бо ошпазҳои ошхона ва аз фаъолияташ дар тарабхонаи Саёҳат гуфт.
Назира Шарипова, ҳаммуассиси тарабхонаи “Трактир Консерватор” нигоҳи хешро дар бораи тиҷорати тарабхонадорӣ баён кард.
Денис Пешевич сарошпаз аз Сербия бобати фаъолияташ дар Амини ва Дорадо маълумот дод.
Раҳим Ҳақбердиев, пойгузори платформаи menu.tj ва яке аз муассисони “Сим-Сим” дар бораи чи гуна фоида ба даст овардан аз тарабхона суҳбат кард.
Инчунин дар форум муҳокимаву мубоҳиса ва бозиҳои бурднок гузаронида шуда, иштирокчиёни фаъол соҳиби шаҳодатнома барои рафтан ба тарабхона ва ҳатто сафар ба Туркия шуданд.
