Конфронси омӯзишии English Without Borders имсол низ доир гардид. Ин ҳамоиш рӯзҳои 19-20 ноябр дар Маркази Исмоилияи шаҳри Душанбе баргузор шуда, беш аз 20 омӯзгорони забонҳои хориҷӣ аз манотиқи гуногуни ҷумҳурӣ, ки дар муассисаҳои таҳсилоти миёна ва донишгоҳу марказҳои омӯзишӣ забони англисӣ меомӯзананд, дар ҳамоиш ҷалб шуданд.
Конфронс ҳамасола доир гардида, ба муаллимон, мутахассисон ва олимони забони англисӣ барои табодули афкор, омӯхтани тамоюлҳои нав, васеъ намудани шабакаҳои касбии онҳо, дастрасӣ ба маводи маҳаллӣ ва байналмилалӣ барои таълими забони англисӣ имконият фароҳам меорад.
Дар рафти конфронс омӯзгорони соҳибтаҷрибаи дохиливу хориҷӣ ба муаллимони ҷавон усулҳои нави омӯзиши забони англисиро нишон доданд. Ҳамзамон, намояндагони сафорати Амрико дар Тоҷикистон ба иштирокчиён дар бораи барномаҳои мубодилавӣ барои омӯзгорони забони англисӣ ва тарзи навишту пешниҳоди лоиҳа суҳбат анҷом доданд.
Дар ҳамоиши дурӯза, рушди маҳорати фикронии хондандагон, омӯзиши забони англисӣ тавассути мусиқӣ, истифодаи технология да рафти омӯзиши забони англисӣ, омӯзиши забони англисӣ барои маъюбон, тартиби гузаронидани мусоҳиба ва ғайра баррасӣ ва дар фарҷоми ҳамоиш ба иштирокчиён сертификат тақдим гардид.
Довуд Акобиров
