Азизҷон Азимии 24-сола, яке аз ҷавонони муваффақи тоҷик маҳсуб ёфта, муассиси ширкатҳои TajRupt ва tajrupt.ai мебошад. Ӯ ахиран бобати комёбию нокомиҳои худ дар Амрико қисса кард.
“Мехостам дар Ҳарвард таҳсил кунам. Як қатор дастовардҳо доштам. Президенти мактаб, сартими дастаи футбол, президенти маҳфиле дар СММ будам, худро ҳамчун лидер нишон додам. Зеро, дар донишгоҳҳои ба мисли Ҳарвард лидер бояд бошӣ. Аммо чӣ рӯх дод?!
14 сол доштам, ба донишгоҳҳои машҳур ҳуҷҷат супоридам… 15 марти соли 2012 тақрибан соати 16 Донишгоҳи Панселвания ҷавоби рад дод. Баъди ду соат аз Донишгоҳи Принстон (Princeton University) ҷавоби рад, боз бо гузашти ду соат аз Ҳарвард посухи рад гирифтам. Ҳамон шаб 8 донишгоҳ ба дархости ман ҷавоби рад додаанд.»,-нақл кард Азизҷон Азимӣ дар Business Forum G5.
Азизҷон Азимӣ мегӯяд, ҷавонон набояд интизор бошанд, ки касе дасташонро мегирад. Баръакс, ташаббус нишон дода, худашон коре анҷом диҳанд.
Соли 2018 исми ӯ дар миёни 49 стипендиягирандагони Барномаи “The Knight-Hennessy Scholars” пайдо шуд. Инчунин Азизҷон ҳамон сол ба рӯйхати «30 то 30»-и маҷаллаи Forbes ворид гардид ва аввалин намояндаи Тоҷикистон ин рӯйхат маҳсуб мешавад. Ёдовар мешавем, ки ба рӯйхати «30 то 30» соҳибкорони ҷавонтарин шомил мешаванд.
Азизҷон Азимӣ соли 1997 дар шаҳри Хуҷанд ба дунё омада, аз сини хурдсолӣ ба омӯхтани забонҳои хориҷӣ шавқу рағбат доштааст. Ӯ дар синфи 9-ум дар озмуни байналмиллалии I-SWEEEP 2008 дар ш. Хюстони ИМА иштирок карда, сазовори ҷои 1-ум ва медали тилло гардида буд. Азизҷон пас аз ин ғолибият таҳсилро дар мактаби хусусии Разӣ дар ш. Ню-Йoрки ИМА давом дода, соли 2012 мактабро бо баҳои аъло, ҷоизаи академикии президенти вақти ИМА Барак Обама ва ҳамчун роҳбари «ҳукумати хонандагон» хатм кардааст. Вай баъдан дар факултаи аълохонони донишгоҳи Хофстра (Hofstra University) бо стипендияи президенти донишгоҳ таҳсилро давом дода, пас аз 1 соли хониш дар ин донишгоҳ ба Донишгоҳи Ню-Йорк (NYU) гузаштаст.
