Рассоми ҷавони тоҷик Пайрав Гулов ҳоло дар Қибрис қарор дорад ва чанде қабл тавсирҳояшро ба намоиш гӯзошт. Қаблан низ мусавараҳои ӯ дар Олмон, Туркия, Амрико, Фаронса, Русия, Ҳиндустон ва чандин кишварҳои дигар ба намоиш гузошта шуда буданд.
Соли 2016 дар намоиши байналмилалии «Рассомон барои сулҳ» таҳти унвони «Дурдонаҳои Роҳи абрешим», ки дар Душанбе доир шуда, рассомони 30 кишвар дар он ширкат намуда буданд. Асарҳои Пайрав дар ин намоишгоҳ хуш пазируфта шуда буд. Дар ҳамин намоиши байналмилалӣ Пайрав Гулов ҷоизаи Академияи рассомони Чинро соҳиб гардид ва онро Президенти Тоҷикистон Эмомалӣ Раҳмон ба ӯ супурд.
Пайрав Гулов дар намоишгоҳи байналмилалии «Рассомони ҷаҳон», ки соли 2013 дар Ҷумҳурии Мардумии Чин баргузор шуда буд, ширкат варзидааст. Баъдан ду бори дигар ба намоишгоҳҳоои рассомӣ ба Чин даъват шуда, ҳамчунин Соли 2019 дар шаҳри Бишкеки Ҷумҳурии Қирғизистон дар доираи Саммити сарони кишварҳои узви СҲШ намоишгоҳи рассомӣ таҳти унвони «Саёҳат ба хотири Сулҳ» баргузор гардида, дар намоишгоҳи мазкур рассомон аз кишварҳои узви СҲШ асарҳои худро ба намоиш гузоштанд. Пайрав Гулов, ки чандин бор дар намоишгоҳи рассомии кишварҳои СҲШ иштирок кардааст, ду асари худ- «Мақбараи Шоҳи зинда» ва «Самарқанди куҳан»- ро манзури меҳмонони ин чорабинии байналмилалӣ гардонид.
Манзараҳои зебои Тоҷикистон, зиндагии одии мардуми тоҷик, урфу одатҳои шарқӣ дар мусавараҳои Пайрав Гулов бештар дида мешавад. Масалан, дар як асари ӯ гуштигирии ду пирамард тасвир ёфтаанд, ки хеле диданиву ҷолиб аст.
Пайрав дар тамос ба мо нақл кард, ки чаро дар Қибрис қарор дорад ва айни ҳол бо чи коре машғул аст.
Мавсуф мегӯяд, барои иштирок дар Симпозиуми рассомон даъват шуда буд, ки дар он анқариб 60 рассом аз Қазоқистон, Қирғизистон, Ӯзбекистон, Тоҷикистон, Доғистон ва Молдова иштирок карданд:
-Тоҷикистонро чор нафар намояндагӣ карданд. Шарти симпозиум ин буд, ки бояд дар мудати 18 рӯз 6 мусаввараи бузург пешниҳод намоӣ ва дар намоиши рассомӣ ширкат варзӣ. Ҳамин тавр мо асарҳоямонро дар муддати ҳаждаҳ рӯз омода кардем ва асарҳои ман барояшон писанд омад. Бароям пешниҳод намуданд, ки чил рӯзи дигар бимонам ва 20 асари дигар омода созам, дар ин сурат метавонам намоиши рассомии худамро баргузор намоям. Ман низ ин пешниҳодро қабул кардам. Аммо намоишгоҳи ман дар шароити пандимеяи “COVID 19” диор гардид. Бо вуҷуди ин, кори ман ба муассисони ин симпозиум писанд омад ва бароям пешниҳод намуданд, ки колексияи наверо омода намоям.
Бештар аз як сол аст, ки ин рассоми тоҷик дар шаҳри Қибрис қарор дорад ва тасвирҳои ӯ дар Осорхонаи санъати муосири ин шаҳр ҷой дода шудааст. Мувофиқи низомномаи симпозиум тасвирҳое дар ин макон ҷой дода мешаванд, ки баёнгари зиндагии имрӯзи дунё бошанд ва шаст дарсади мусавараҳои Пайрав Гулов низ аз зиндагии мардуми тоҷик ва анъанаҳои қадимаи мо қисса мекунанд:
-Техникаи кории ман ҳамин аст ва бештар одатҳои мардуми кишварам дар зеҳнам чарх мезананд. Ҳамчунин масъулони ин ҳамоиш тасвирҳоямро бо ҳамин хусусиятҳояш писандиданд.
Пайрав Гулов Донишкадаи давлатии фарҳанг ва санъати Тоҷикистон ба номи Мирзо Турсунзода –ро соли 2006 хатм намудааст. Ҳоло дар Осорхонаи санъати Ҷумҳурии мардумии Чин шаш мусавараи ӯ нигоҳ дошта мешавад. Дар Осорхонаи миллии Тоҷикистон мусавараи 20-метра, ки дар он манзараи зебои кишвар инъикос ёфтааст, кори дасти ӯст. Ҳамчунин силсилаи портретии 48 Қаҳрамони Ҷанги Бузурги Ватанӣ корҳои бузурги Пайрав маҳсуб мешаванд.
Фурқати Низом
