Маъюбӣ Умар Гадоевро мағлуб карда натавонист
Умар Гадоев дар муҳоҷират ҷароҳат бардошта, дигар натавонистааст корро дар Русия идома диҳад. Ӯ ҳоло маъюби гурӯҳи якум буда, дигар мустақилона наметавонад роҳ гардад. Ӯ бо ёрии асобағал ё аробаи электрикии маъюбӣ роҳ меравад.
Ӯ аз соли 2009 инҷониб дӯзандагӣ мекунад. Ҳоло худро нафари нолозим дар ҷамъият намеҳисобид ва ҳунари дӯзандагиро ба дигарон низ меомӯзонад.
Дар кунҷи хонааш барои худ ва ҳамдеҳагонаш сехи дӯзандагӣ боз карда, рӯзгорашро аз ин ҳисоб таъмин мекунаду ба дигарон низ касб меомӯзад.
Умар ду духтар дорад. Талош дорад, ки барои онҳо шароити хуберо фароҳам намуда, духтаронашро соҳибмаълумот гардонад.
У. Гадоев то имрӯз беш аз 200 шогирд омода кардааст. Ягона орзуяш ин аст, ки сехи дӯзандагиашро бузург намояд. Аммо барои амалисозии орзруяш маблағи ҳангуфте лозим мешавад ва умедвор аст, ки рӯзе соҳибкоре сӯяш дасти ёрӣ дароз мекунад то орзуи худу шогирдонашро бароварда созад.
Ҳамчунин нақша дорад, ки дар деҳааш давраҳои омӯзишии пазандагиро роҳандозӣ кунад то ҳамдеҳагонаш дар зиндагӣ азият накашанд.
Набиҷони Саидаброр
