Сарвазири Исроил дастур додааст, ки шахсияти афсароне, ки дар филми мустанади NAZA мусоҳиба додаанд, ошкор карда шавад. Ин филм соҳиби ҷоизаҳои байналмилалӣ гардидааст.
Бинёмин Нетаняҳу аз додситони кулли Исроил Гали Баҳарав-Миара, сардори Ситоди кулли артиши Исроил , генерал-лейтенант Эял Замир ва роҳбари Хадамоти амнияти дохилии «Шин-Бет» Давид Зини талаб кардааст, ки шахсияти афсарони дар филм назари худро гуфтаанд, ошкор кунанд.
Бинёмин Нетаняҳу ҳамчунин талаб кардааст, ки коргардонҳои филм Ювал Иброҳим ва Рейчел Сзор, ки барандагони ҷоизаи «Оскар» шуданд, барои расонидани «зарар ба манфиатҳои дипломатӣ ва мудофиавии Исроил» ба ҷавобгарӣ кашида шаванд.
Филми NAZA, ки нахустнамоиши он дар Венетсия баргузор шуда, сазовори ҷоизаи махсуси ҳакамон гардидааст, ҳоло дар кинотеатрҳои беш аз 50 кишвари ҷаҳон намоиш дода мешавад.
Тибқи тавсифи расмӣ, филм «низоми пуштибони куштори оммавии ҳадафмандонаи аҳолии осоиштаи Фаластин дар Ғаззаро ба таври муфассал нишон медиҳад.
Наворбардории пинҳонии филм шабона, дар болои бомҳои шаҳри Тел-Авив ва дар замони идомаи ҷанг дар Ғазза сурат гирифтааст. Дар он мусоҳиба бо 24 афсари хадамоти иктишофии ҳарбии Исроил, сарбозон ва дигарон ворид шудааст.
Онҳо нақл мекунанд, ки чӣ гуна ҳадафҳо миёни фаластиниҳо интихоб мешаванд ва зарбаҳо бо истифода аз низомҳои зеҳни сунъӣ ва назорати автоматиконидашуда дар низомҳои муайянкунии ҳадафҳои ҳарбӣ анҷом дода мешаванд. Ин амалҳо дар ҳолест, ки ба гуфтаи иштирокчиёни филм, Исроил аз ҳузури аҳолии осоишта дар минтақаҳои мавриди ҳамла огоҳ аст.
Барои ҳифзи шахсияти мусоҳибон чеҳра ва садои онҳо бо усулҳои рақамӣ тағйир дода шудаанд.
Ин филми мустанади 80-дақиқаӣ, ки баҳсҳои зиёдеро ба миён овардааст, ба таҳқиқоти солҳои 2023–2025 такя мекунад. Ин таҳқиқотро нашрияи муштараки исроиливу фаластинии +972 Magazine, нашрияи ибризабони Local Call ва рӯзномаи бритониёии The Guardian нашр карда буданд.
Филм дар ҷашнвораи синамои Венетсия бо кафкӯбии тӯлонии тамошобинон истиқбол гардид. Тамошобинон 25 дақиқа рост истода кафкӯбӣ карданд, ки тибқи гузоришҳо, тӯлонитарин кафкӯбӣ дар таърихи ин ҷашнвора мебошад.
Ҳукумати Исроил қаблан низ коргардонҳо Иброҳим ва Сзорро шадидан танқид карда, ҳатто таҳдид карда буд, ки онҳоро аз шаҳрвандии Исроил маҳрум мекунад.
Тавре рӯзномаи The Guardian хабар додааст, дабири кулли Федератсияи аврупоии рӯзноманигорон Рикардо Гутйеррес изҳор доштааст:
«Ин таҳдидҳо амали ошкорои тарсонидани рӯзноманигорон мебошанд, ки танҳо вазифаи худро мутобиқи меъёрҳои ахлоқии касбӣ ва ба манфиати ҷомеа иҷро кардаанд».
Ӯ дар шарҳи таҳдидҳои Нетаняҳу афзудааст:
«Ин вокуниши шадид маро ба ҳайрат намеорад. Он бори дигар тасдиқ мекунад, ки ин режим барои пинҳон кардани ҷиноятҳои зидди башарият ва қатли омми идомаёбанда дар Ғазза ба ҳар коре омода аст».
Филми NAZA дар кинотеатрҳои интихобшудаи беш аз 50 кишвар ба таври маҳдуд намоиш дода мешавад. Қарор аст моҳи ноябр он дар сомонаи The Guardian барои тамошои ройгон дастрас гардад.
