Ҳукумати Канада тарҳи маблағгузорӣ ва сохтмони хати ноқили зериобии фароатлантикиро меомӯзад, ки Канада ва Аврупоро мустақиман, бидуни убур аз қаламрави ИМА, ба ҳам мепайвандад.
Тавре ки Bloomberg хабар медиҳад, хатти алоқа метавонад ба масофаи 4,5 ҳазор километр аз Норвегия то Канада кашида шавад. Ҳаҷми сармоягузорӣ барои сохтмони он беш аз 620 миллион доллари ИМА арзёбӣ мешавад.
Ин ташаббус ба ширкати норвегии Bulk тааллуқ дорад, ки ба сохтмон ва кашидани хатҳои кабелии зериобӣ машғул аст. Аммо 65 дарсади саҳмияҳои ин ширкат ба сохтори фаръии ширкати канадагии Sun Life Financial Inc. тааллуқ доранд. Ҳамчунин, чанд фонди нафақавии Канада ба он сармоягузорӣ мекунанд. Тарҳи кашидани ноқил моҳи сентябр дар ҳамоиши ҷаҳонии сармоягузорон, ки бо ташаббуси ҳукумати Канада баргузор шуд, муаррифӣ гардид.
Ба иттилои Bloomberg, намояндагони Иттиҳоди Аврупо ва Канада бояд дар марҳилаи аввал тарҳ ва масири онро якҷо таҳия ва тасдиқ кунанд. Қадами нахуст дар ин самт изҳороти муштараке хоҳад буд, ки қарор аст 29 октябр дар шаҳри Монреал нашр шавад. Дар он Канада ва Иттиҳоди Аврупо эълон мекунанд, ки «роҳи беҳтарини густариши робитаҳои рақамӣ байни Аврупо, Канада ва Осиёро тавассути бунёди инфрасохтори нави ноқилҳои зериобӣ» ҷустуҷӯ хоҳанд кард.
Айни замон Канадаро бо кишварҳои дигар танҳо чанд ноқили зериобӣ мепайвандад, ки аз қаламрави ИМА мегузаранд. Ҳеҷ кадоме аз онҳо моликияти ширкатҳои канадагӣ нест.
Калонтарин ноқили зериобӣ бо номи Topez ба ширкати Alphabet, соҳиби Google, тааллуқ дорад ва Канадаро бо Ҷопон мепайвандад.
