Одатан кам мешунавем, ки лӯлиҳо иқдом ба кори хайре намуда, дасти кумак барои касе дароз кунанд. Онҳо дар навоҳии мухталифи кишвар ба сар мебаранд ва шуғли қисме аз онҳо талбандагӣ аст. Аммо кори як хонаводаи лӯлӣ боиси тааҷҷуб ва таҳсини аксарият шудааст, ки маблағи калонеро сарфи корҳои ободонӣ намуд. Як хонаводаи миёнаҳоли лӯлӣ аз ноҳияи Ҷалолиддини Балхии вилояти Хатлон барои ободонии деҳаашон-Ҳаливар 150 ҳазор сомонӣ харҷ кардааст.
Дар деҳаи Ҳаливар асосан лулиҳо зиндагӣ мекунанд. Нуриддин Йериқулзода, сокини ин деҳа мегӯяд, бо бародараш ба муҳоҷират мераванд ва онҳо тасмим гирифтанд, ки маблағи аз муҳоҷират ба дастовардаро на барои хариди мошин ва сохтани манзили боҳашамат харҷ карда, балки маблағро барои ободонии деҳа сарф намоянд.
Агарчи бо шунидани номи «лӯлӣ» дар зеҳни аксарият талбанда хутур мекунад, вале Нуриддин мегӯяд, ҳоло мардон аз ин қавм ба муҳоҷират рафта, кори аз гузаштагонашон ба мерос гирифтаро идома намедиҳанд ва барои ҳамеша тарки талбандагӣ кардаанд.
Нуриддин нақл мекунад, ки деҳаро бо роҳу трансформатор таъмин карда, инчунин ноқили барқ ҳам ба деҳа дастрас карданд, ки харҷи умумӣ ба ин корҳо 150 ҳазор сомониро ташкил дод.
Муаллиф: Бахтиёр Комилов
