Забони чинӣ серистеъмолтарин забон дар ҷаҳон

Дар радифи забонҳои русӣ ва англисӣ инчунин омӯзиши забони чинӣ дар миёни ҷавонону наврасони тоҷик меафзояд.

Мувофиқи маълумоти оморӣ забони чинӣ яке аз серистифодатарин забонҳои ҷаҳон буда, тақрибан 1.4 млрд сокини  сайёра бо ин забон гуфтугӯ мекунанд. Ҳамзамон, забони чинӣ яке аз 6 забони расмии СММ интихоб гардидааст.

Дар Тоҷикистон теъдоди марказҳое, ки забони чиниро меомӯзонанд, ҳамасола афзӯда, ҳамасола ҳазорон нафар ҷавонону наврасон ба онҳо ҷалб мегарданд. Яке аз марказҳои бузурги омӯзиши забони чинӣ дар Тоҷикистон-Маркази таълимию фарҳангии Конфусияи назди Донишгоҳи миллии Тоҷикистон мебошад, ки аз соли 2008 инҷониб фаъолият намуда, ҳудуди 10 ҳазор донишҷӯи тоҷик дар он забони чиниро аз худ намудаанд. Бахши дигари ин марказ дар заминаи Донишкадаи фанноварии кӯҳии шаҳри Бӯстони вилояти Суғд фаъолият дорад.

Мувофиқи маълумотҳои оморӣ, дар ин марказҳо зиёда аз 36 омӯзгори забони чинӣ, ки шаҳрвандони Ҷумҳурии мардумии Чин мебошанд, ба тадрис машғуланд. Шумораи шавқмандони ин забон бошад рӯз ба рӯз зиёд мешаванд.

Маркази таълимию фарҳангии Конфусияи назди Донишгоҳи миллӣ дар дохили бинои факултаи фалсафа воқеъ буда, дар радифи донишҷӯёни донишгоҳ инчунин наврасон низ ба он ҷалб гашта, забони чиниро аз худ менамоянд.

Ёдовар мешавем, ки аз соли 2010 ба ин сӯ ҳамасола 20 апрел рӯзи забони чинӣ таҷлил мешавад. Ин сана аз ҷониби Департаменти иттилооти ҷамъиятии СММ «бо мақсади таҷлили бисёрзабонӣ ва мусоидат ба истифодаи баробари ҳамаи шаш забони давлатӣ дар тамоми Созмон» ихтисос дода шуд.

                                                                                        Муаллиф: Довуд Акобиров

ПИСАНД ОМАД? БО ДӮСТОНИ ХУД МУБОДИЛА КУНЕД!
Like
Love
Haha
Wow
Sad
Angry
Back to top button