Дар нусхаи охирини Skype паёме вуҷуд дорад, ки ин василаи иртиботӣ дар моҳи майи соли 2025 баста мешавад.
Нусхаи охирини Skype барои Windows дорои сатре бо паёми зерин аст, ки «аз моҳи май Skype дигар дастрас нахоҳад буд. Занг задан ва мукотиба карданро дар Teams идома диҳед.»
Ширкати Microsoft то ҳол вазъро шарҳ надодааст ва дар бораи нақшаҳои бастани ин хадамоти машҳур чизе нагуфтааст.
Skype соли 2003 ба фаъолият оғоз кард ва солҳои тӯлонӣ маъмултарин хадамот барои мубодилаи паёмҳо боқӣ монд. Microsoft Skype-ро соли 2011 ба маблағи 8,5 миллиард доллар харидорӣ кард ва кӯшиш намуд, ки онро барои Windows, Windows Phone ва Xbox ҳамгиро кунад.
Солҳои охир таваҷҷӯҳ ба Skype коҳиш ёфт. Microsoft натавонист онро дар давраи пандемия рақобатпазир гардонад ва бисёре аз корбарон ба платформаҳои муосиртар гузаштанд.
Microsoft таҷрибаи Skype-ро барои эҷоди хадамоти корпоративии худ Teams истифода бурд, аммо корбарии Teams ва Skype ба таври назаррас фарқ мекунад.
Акс аз шабакаи интернет
