Президенти ИМА Доналд Трамп фармонеро имзо кард, ки иштироки варзишгарони тағйири ҷинскарда (трансгендер)-ро ба мусобиқаҳои варзишии занона манъ мекунад.
«Аз ин ба баъд, варзиши занона танҳо барои занон хоҳад буд.», — гуфт Трамп дар иҳотаи занону духтарони варзишгар пеш аз имзои фармон дар Кохи Сафед. — Бо ин фармон ҷанг алайҳи варзиши занона ба охир расид.»,-гуфтааст ӯ.
Ба таъкиди Трамп, ИМА ба варзишгарони трансгендер виза намедиҳад.
Фармон асосан барои мусобиқаҳои мактабӣ, донишгоҳӣ ва ҳаваскорӣ эътибор пайдо мекунад, аммо Трамп изҳор дошт, ки аз Кумитаи байналмилалии олимпӣ нисбат ба варзишгарони трансгендер то оғози Бозиҳои олимпӣ дар Лос-Анҷелес, ки соли 2028 баргузор мегардад, тағйир додани қоидаҳоро талаб мекунад.
Ӯ дар рӯзи савгандёдкунӣ таъкид карда буд, ки сиёсати давлатии ИМА танҳо ду ҷинсро эътироф мекунад — мард ва зан.
