Намояндагони 12 иёлот ният доранд тавассути додгоҳ Департаменти самаранокии идораи давлатии ИМА (DOGE)-ро, ки миллиардер Илон Маск сарварӣ мекунад, аз дастрасӣ ба иттилоот маҳдуд кунанд. Дар ин бора додситони кулли Ню-Йорк Летитсия Ҷеймс хабар додааст.
«Маск ҳамчун сарватмандтарин шахси рӯи замин ба шунидани калимаи «не» одат накардааст, аммо дар кишвари мо ҳеҷ кас болотар аз қонун нест. Президент салоҳияти додани иттилооти шахсиро ба онҳое, ки интихоб кардааст, надорад ва ӯ наметавонад пардохтҳоеро, ки Конгресс тасдиқ кардааст, қатъ кунад.», — омадааст дар изҳороти Ҷеймс.
Дар изҳорот ба Ҷеймс додситонҳои кулли Аризона, Калифорния, Колорадо, Коннектикут, Делавэр, Мэн, Мэриленд, Миннесота, Невада, Род-Айленд ва Вермонт ҳамроҳ шуданд.
Як довари федералӣ ҳам амр додааст, ки ду иттифоқчии Маск ба системаҳои пардохти Вазорати молия «танҳо дастрасии хондан» дошта бошанд, аммо ҳеҷ каси дигар ҳоло дастрасӣ нахоҳад дошт, аз ҷумла худи Маск.
Қаблан расонаҳои амрикоӣ навишта буданд, ки кормандони идораи таҳти сарварии Маскба маълумоти махфии миллионҳо хизматчиёни давлатӣ дастрасӣ пайдо кардаанд. Сухан дар бораи иттилоот аз идораи хадамоти кадрӣ, суроғаҳо, маошҳо, номҳо ва рақамҳои суғуртаи иҷтимоӣ меравад.
Акс аз манбаъҳои боз
