“Имконият” тавоноии бонувони маъюбиятдоштаро зиёд кард

Ҷамъяти маъюбони шаҳри Душанбе “Имконият” бо дастгирии Сафорати Амрико дар Душанбе лоиҳаеро бо номи «Фаҳмондадиҳии ҷомеа ба мақсади коҳиш додани сатҳи доғгузорӣ нисбат ба шахсони маъюбиятдошта» амалӣ кард, ки дар доираи он 50 бонуи маъюбиятдошта аз шаҳри Душанбе, Ҳисор, Варзоб, Турсунзода, Файзобод ҷалб шуданд. Равоншинос барои боло бурдани худбаҳодиҳии ин духтарону бонувон кумак кард. Дар семинарҳо бобати ҳуқуқҳои хеш маълумот ба даст оварданд. Дар курсҳои кутоҳмуддат ҳунари дӯзандагӣ, пӯхту паз ва ороиши рӯю мӯйро омӯхтанд. Як ҳадафи лоиҳа ба ҷомеа ворид кардани маъюбон буд, ки дастандаркорони лоиҳа мегӯянд то ҷое ба ин ҳадафи хеш расиданд. Инчунин чандин нафари иштирокчиёни лоиҳа ҷойи кор пайдо карданд.