Давлаталӣ Саид, раиси вилояти Хатлон ба муносибати Рӯзи модар ба кӯҳансолтарин пиразани вилояти Хатлон, ки дар ноҳияи Темурмалик зиндагӣ мекунад, армуғони идона фиристод. Ғазалшо Сафарзода, сардори раёсати маорифи вилоят бо Ҳасанзода Шералӣ раиси ноҳияи Темурмалик имрӯз, 7 март тӯҳфаҳоро ба ин пиразани 110-сола дастрас намуданд.
Фотима Салимоваи 110-сола дар Ҷамоати деҳоти Саидмуъмин Раҳимов (собиқ Ҷорубқул)-и ноҳияи Темурмалик зиндагӣ мекунад.
Ӯ 20-уми январи соли равон ба сини 110 солагӣ қадам ниҳода буд. Бибии Фотима, ки 110 сол дорад, айни ҳол худро бардам эҳсос мекунад, озодона ҳарф мезанад, пайвандону атрофиёнашро мешиносад.
Фотима Салимова дар 17-солагӣ ба шаҳвар мебарояд. Соли 1941 шаҳварашро ба Ҷанги Бузурги Ватанӣ мебаранд ва ӯ дар набард қаҳрамонона ҳалок мегардад. Бибии Фотима мисли дигар занҳои тоҷик он шабу рӯз меҳнат мекардааст. Маҳз ба ин хотир ӯро барои меҳнати софдилона дар ақибгоҳ ва саҳмаш дар кори Ғалаба бар фашизм соли 2020 аз номи Президенти Федератсияи Русия бо медали “75 солагии Ҷанги Бузурги Ватанӣ 1941-1945” сарфароз гардонданд.
Фотима Салимова соли 1948 бори дуюм ба шавҳар мебарояд. Имрӯз ӯ соҳиби 3 фарзанд, 20 набера, 75 абера мебошад. Писари бузургаш Қарабой Гулаев 73 сол дошта, Назир 60-сола ва Бозорбой 66-сола ҳастанд.
Шералӣ Давлатов
