Дирӯз, 29 декабр Қаҳрамони секаратаи ҷаҳон, футболбози машҳур Пеле (Эдсон Арантис ду Насименту) пас аз бемории тӯлонӣ дар синни 82-солагӣ аз олам чашм пӯшид.
Тирамоҳи соли 2021 ба варзишгар саратони рӯдаи ғафс ташхис гузоштанд ва ба иттилои расонаҳо, ӯ кимиёдармонӣ низ шуд, вале аҳволаш тадриҷан бадтар гардид. Аввали моҳи декабр собиқ футболбози тими миллии Бразилия дар ҳолати вазнин дар бемористон бистарӣ шуд.
Рӯзи 22 декабри соли равон духтари Пеле эълон кард, ки Мавлуди Исоро дар бемористон мегузаронад ва пас аз чаҳор рӯз, менеҷери варзиш Фрэнк Холид гуфт, Пеле бо хонаводааш видоъ карданро оғоз кардааст.
Пеле соли 1940 дар Трес Коракоинси Бразилия таваллуд шудааст. Ӯ дар 7-солагӣ дар тими футболи маҳаллӣ бозӣ кард ва дар синни 17-солагӣ дар ҳайати тими миллии Бразилия вориди майдони Ҷоми ҷаҳон шуд ва ин кишвар бори аввал дар таърих ғолиби Ҷоми ҷаҳон кард.
Пеле ягона футболбози ҷаҳон аст, ки се бор (солҳои 1958, 1962 ва 1970) барандаи Ҷоми ҷаҳон шудааст. Вай дар ҳайати Бразилия 92 бозӣ анҷом дода, 77 гол задааст. Кумитаи байналмилалии олимпӣ, Федератсияи байналмилалии таърих ва омори футбол, ФИФА ва як қатор созмонҳои дигар Пелеро беҳтарин футболбози асри 20 эътироф карданд.
Пеле фаъолиятҳои иҷтимоӣ низ дошт ва барои беҳтар кардани муҳити зист мубориза мебурд.
Владимир Путин, Пеле ва Диего Марадона. Маскав, декабри соли 2017. Акс аз шабакаи интернет
