Камила Каримова хонандаи синфи 10-и мактаби назди Донишгоҳи славянии Русияву Тоҷикистон буда, як солу чаҳор моҳ аст, ки бо гитор “дӯстӣ” дорад. Ҳарчанд аз овони кӯдакӣ ба омӯхтани асбобҳои мусиқӣ майл дошт, аммо имкони харидории пионинаро пайдо накард. Зеро, оилаи Камила макони зисташонро зуд-зуд иваз мекарданд ва ин ҷойивазкунӣ низ сабаби дертар ба дунёи санъат ворид шудани ӯ ба ҳисоб меравад.
Камила гиторро хуб менавозад вале идао намекунад, ки навозандаи моҳире гардидааст:
“Ман даъво надорам, ки аз уҳдаи гиторнавозӣ мебароям, балки ҳоло дар ин ҷода навроҳам ва кӯшиш мекунам, ки ҳамарӯза чизи наверо омӯзам, маҳоратамро такмил диҳам.”
Камила асосан “фингерстайл” тамрин мекунад. Ҳамчунин барои дарку истифодаи мусиқиҳои рок, оҳанги суруди гурӯҳҳои Arctic monkeys, Metallica, Kaleo, Nirvana ба услуби “басс” ва “электро”-ро машқ мекунад.
Муносибати ҷомеа бо ӯ ҳамчун духтари гиторнавоз якранг нест: “Вақте баъзеҳо мефаҳманд, ки ман гиторнавозам, ҳайрон мешаванд ва вақте ба гиторнавозӣ мепардозам, тааҷҷуб мекунанд. Нигоҳи аксарият мусбат буда, наворҳоям дар Instagram хуб пазируфта мешавад. Аз мардум шикояте надорам, баръакс, онҳо маро хуб қабул мекунанд. Махсусияти кори ман дар он аст, ки натанҳо се-чор “аккорд” медонам, балки бо услуби “фингерстайл” менавозам.”
Камила то як соли пеш ба курси гиторнавозӣ мерафт ва ҳоло мустақилона ҳунарашро сайқал медиҳаду орзуи иштирок дар озмунҳоро дорад.
Ҳ. ТОҲИРӢ
