Муҳаммад Холов пас аз 16 соли ноумедӣ, тангдастӣ ва сарсонию бенавоӣ тавонист дар Озмуни Central Asia’s Got Talent ширкат намояд ва дубора ба зиндагии муқаррарӣ дилгарм шавад. Бо қарори якдилонаи ҳайати ҳакамон ба даври ниҳоӣ роҳхат ба даст овард. Ӯ дар озмун суруди касеро бозхонӣ накард, балки зиндагии талхи хешро бо оҳанг қисса кард.
Муҳаммад ҳоло бо тамоми нерӯ ба даври ниҳоии Central Asia’s Got Talent омодагӣ мегирад.
Ин ҳунарманд мегӯяд, озмун зиндагии ӯро куллан тайғир дод, афродеро, ки гум карда буд, пайдо намуд, бисёриҳо ӯро дубора ба хотир оварданду аз нав маҳбубият касб кард.
Муҳаммад Холов 11 сенябри соли 1974 дар шаҳри Душанбе ба дунё омадааст. Ӯ хатмкардаи Донишкадаи давлатии фарҳанг ва санъати Тоҷикистон буда, дар даҳаи охири қарни гузашта бо шӯхӣ ва тақлидҳояш дар ҳайати гурӯҳи ҳаҷвии Ғарибшо маҳбубият ба даст оварда буд.
Дар тӯй ва маъракаҳо иштирок ва табъи мардумро болида месохт. Дар авҷи шӯҳрат ба садамаи нақлётӣ дучор шуд. Баъд аз ин ҳодиса зиндагиаш куллан тайғир ёфт. Муҳаммад саҳнаро тарк кард, зеро, роҳ рафтан барояш душвор шуда буд. Дигар ба тӯю маъракаҳо намерафт, базмҳо бидуни иштироки ӯ доир мешуданд. Ба қавли ӯ, тӯли ин 16 сол аз бисёр шебу фарозҳоро гузашт, бархе ӯро тарк карданду чеҳраи аслии бисёриҳо барояш ошкор шуд.
Муаллиф: Муҳаммад Маҳмадзода
Акс аз Хабаргузории «your.tj»
