Айни ҳол 258 миллион кӯдаку наврас аз мактаб берун мондаанд. Бинобар ин, Маҷмаи Умумии Созмони Милали Муттаҳид бо қатъномаи худ аз 3 декабри соли 2018 (A/RES/73/25) 24 январро Рӯзи байналмилалии маориф эълон намуда, нақши онро дар ноил шудан ба сулҳ ва рушд муҳим донист.
Дар қатънома таҳсилот барои ноил шудан ба рушди устувор муҳим шумурда шуда, таъкид мегардад, ки маориф маҳсулнокии инфиродӣ ва иқтидори рушди иқтисодиро боло бурда, камбизоатию гуруснагиро решакан ва ба солимию баробарии гендерӣ мусоидат менамояд.
Дар ҳуҷҷат ҳамчунин гуфта мешавад, ки бояд барои фарогирӣ тамоми муассисаҳои таълимӣ, аз ҷумла таҳсилоти ибтидоӣ, миёнаю касбӣ ва донишгоҳҳо кӯшиш ба харҷ диҳанд то ҳар як шахс дар ҳаёт имкон ба таҳсил дошта бошад.
Таҳсил ҳуқуқи ҳар як шахс аст, ки дар моддаи 26-и Эъломияи ҳуқуқи башар сабт шудааст. Эъломия даъват мекунад, ки барои ҳама таҳсилоти ибтидоӣ ройгон бояд бошад. Конвенсия оид ба ҳуқуқи кӯдак, ки соли 1989 қабул шудааст, дар бораи ӯҳдадории давлатҳо барои таъмини дастрасии таҳсилот таъкид меварзад.
Мутаассифона, тибқи маълумоти СММ айни ҳол 258 миллион кӯдакону наврасон аз мактаб берунанд; 617 миллион кӯдак малакаҳои ибтидоии хонишу ҳисобро надоранд; камтар аз 40%-и духтарон дар ҷануби Сахараи Африқо маълумоти ибтидоиро мегиранд. Тақрибан чор миллион кӯдак ва ҷавони гуреза аз мактаб берун мондаанд. Ин кӯдакон аз камбизоатӣ, табъиз, низоъҳои мусаллаҳона, ҳолатҳои фавқулодда ва оқибатҳои тағирёбии иқлим азият мекашанд. Муҳоҷирати иҷборӣ ба маориф низ таъсири манфӣ расонидааст.
