Иёлати Флорида алайҳи OpenAI ва роҳбари он Сэм Алтман бо иттиҳоми расонидани зарар ба ноболиғон даъво ба суд пешниҳод кардааст. Дар ин бора шабакаи CNN хабар медиҳад. Флорида аввалин иёлати ИМА мебошад, ки нисбат ба ширкат чунин даъвои судӣ пешниҳод кардааст.
ChatGPT ба беинсофӣ дар фаъолияти тиҷоратӣ ва беэҳтиётӣ муттаҳам мешавад. Дар даъво инчунин гуфта мешавад, ки ChatGPT дар баъзе ҳолатҳо ба қотилони оммавӣ кумак расонида, рафторҳои худкуширо ташвиқ кардааст ва боиси коҳиш ёфтани «маҳоратҳои тафаккури интиқодӣ» дар байни баъзе истифодабарандагон шудааст.
Таваҷҷуҳи махсус ба набудани назорати муассири волидайн равона шудааст. Ба гуфтаи даъвогарон, нусхаи ройгони ChatGPT механизми ҳатмии санҷиши синну сол надорад ва ҳисобҳои кӯдакон ҳатман ба ҳисобҳои падару модар пайваст карда намешаванд.
Ҷеймс Утмайер, додситони кулли иёлати Флорида зимни нишасти матбуотӣ изҳор доштааст, ки Сэм Алтман ва ChatGPT рақобат дар соҳаи зеҳни сунъиро аз амнияти кӯдакони мо болотар гузоштанд. Онҳо фоидаро аз амнияти ҷамъиятӣ муҳимтар донистанд ва мо дар Флорида ба ин роҳ нахоҳем дод.
Дар навбати худ, OpenAI дар изҳороташ эътироф кардааст, ки ноболиғон ба ҳимояи ҷиддӣ ниёз доранд ва таъкид намудааст, ки ширкат аллакай як қатор тадбирҳои пешрафтаи соҳавиро ҷорӣ кардааст. Аз ҷумла, воситаҳои пешбинии синну сол ва огоҳиномаҳо барои волидон ба кор андохта шудаанд.
Даъвои мазкур ба нахустин тафтиши ҷиноятӣ нисбат ба OpenAI такя мекунад, ки моҳи апрел пас аз тирпарронии оммавӣ дар Донишгоҳи давлатии Флорида оғоз шуда буд. Тибқи маълумоти тафтишот, ҳамлагар аз ChatGPT фаъолона истифода мебурдааст.
