Дар ҷаласаи васеи Шурои олимони Донишгоҳи миллии Тоҷикистон қарор қабул шудааст, ки дар ин донишгоҳ Стипендияи Абӯалӣ ибни Сино таъсис дода шавад. Стипендия барои дастгирии донишҷӯёни соҳибистеъдод, рушди фаъолияти илмӣ-тадқиқотӣ, тарғиби мероси илмӣ ва фарҳангии Абӯалӣ ибни Сино ва баланд бардоштани ҳисси худшиносӣ ва ифтихори миллӣ пешбинӣ шудааст.
Мувофиқи тарҳи низомнома, довталабони стипендия бояд на танҳо бо натиҷаҳои аълои таҳсил, балки бо донишу пажӯҳишҳои худ вобаста ба осори Абӯалӣ ибни Сино низ фарқ кунанд. Донишҷӯёни хориҷие, ки дар ДМТ таҳсил мекунанд, низ метавонанд барои дарёфти ин стипендия рақобат намоянд.
Ректори донишгоҳ профессор Эмомалӣ Насриддинзода, таъкид кардааст, ки таъсиси ин ҷоиза барои муаррифии мероси гаронбаҳои Абӯалӣ ибни Сино ва таҳкими ҷойгоҳи илмии Тоҷикистон дар арсаи байналмилалӣ аҳамияти хос дорад.
Ёдовар мешавем, ки ҳафтаи гузашта Эмомалӣ Раҳмон, Президенти Тоҷикистон бо як фармон «Ҷоизаи байналмилалии Абӯалӣ ибни Сино дар соҳаи тиб»-ро таъсис дод.
Ин ҷоиза бо мақсади эътирофи дастовардҳои бузург дар соҳаи тиб, минбаъд тақдим хоҳад гардид.
Фонди Ҷоизаи байналмилалии мазкур ташкил шуда, Ҳукумати кишвар низомномаҳои ҷоиза ва фондро бояд таҳия ва тасдиқ намояд.
