Мақомоти Аморати Муттаҳидаи Араб бо Иёлоти Муттаҳидаи Амрико дар бораи имкони дастрасӣ ба пуштибонии молиявӣ дар сурати тӯлонӣ шудани муноқиша дар Ховари Миёна гуфтугӯ оғоз кардаанд. Дар ин бораи The Wall Street Journal хабар медиҳад.
Ба иттилои рӯзнома, намояндагони АМА дар ҷараёни гуфтушунид таъкид кардаанд, ки дар сурати ба вуҷуд омадани норасоии доллар, кишвар метавонад маҷбур шавад барои фурӯши нафт ва анҷоми амалиёти дигар аз юани чинӣ ё асъори дигар давлатҳо истифода барад.
Ба гуфтаи манобеи амрикоӣ, роҳбари Бонки марказии АМА Халид Муҳаммад Балама ин масъаларо дар мулоқот бо вазири хазинадории ИМА Скотт Бессент ва намояндагони Захираҳои федералӣ дар Вашингтон матраҳ кардааст.
Яке аз пешниҳодҳо таъсиси хатти мубодилаи асъор мебошад, ки имкон медиҳад АМА дар ҳолати зарурӣ ба доллари амрикоӣ дастрасӣ пайдо кунад.
Мақомоти аморат таъкид кардаанд, ки то ҳол тавонистаанд аз таъсири сахти иқтисодии низоъ канорагирӣ намоянд, аммо дар сурати тӯлонӣ шудани буҳрон, эҳтиёҷ ба «нафаси молиявӣ» (дастгирии изтирорӣ) метавонад ба миён ояд.
