Миҷгона Самадова, муштзани тоҷик бо медали тилло ба Ватан баргашт. Ӯ дар Ҷоми ҷаҳон оид ба бокс, ки 7-11 декабр дар шаҳри Нижневартовски Федератсияи Русия баргузор шуд, ширкат карда, пирӯз гардид.
Ӯ нақл мекунад, ки дар мусобиқаи қаблӣ китфаш шадидан зарб хурда буд, вале бо вуҷуди ин, Миҷгона тавонист чор ҳарифашро мағлуб намояд:
“Китфи ман дар чемпионати Осиё (дар Дубай) лат хӯрда буд. Дар ин мусобиқа ман бо китфи латхӯрда баромад кардам. Ба ин нигоҳ накарда, бо як даст чор рақибро шикаст дода, медали тилло ба даст орам.”
Миҷгона Самадова дар рақобатҳо (вазни 57кг) баъди ду пирӯзӣ ба рақибонаш Мишидма Эрденеделай аз Муғулистон ва Моника Серафин аз Лаҳистон ба даври ниманиҳоӣ роҳ ёфт. Ӯ дар нимфинал Малика Шаҳидоваи русиягиро мағлуб кард ва ба финал баромад. Муштзани тоҷик дар муҳорибаи ниҳоияш Мунгунсаран Балсани муғулистониро шикаст дод.
Волидони Миҷгона ҳамвора бо ӯ дар ин иртибот буданд. Маҳз дастгирии онҳо ӯро руҳболида мекард.
Миҷгона медали тиллоро, ки ахиран ба даст овард, ба модараш бахшид ва ҳадафаш ин аст, ки дар бозиҳои олимпии 2024 роҳхат ба даст орад.
“Ҳар вақте ки ба мусобиқаҳо меравам, модарам рақобатҳои маро тамошо намекунад. Вақте бо модарам сӯҳбат мекунам, ӯ гиря мекунад. Ин барои ман як эҳсосоти фаромӯшношуданӣ аст. Ҳар як ҷоизаи худро ба модарам мебахшам.”,- таъкид намуд Миҷгона.
Миҷгона ҳоло донишҷӯи соли 5-уми Академияи Вазорати корҳои дохилии Ҷумҳурии Тоҷикистон аст.
Аминҷон Раҳматзод
