Сергей Тютин соли 10-ум аст, ки дар студияи таълимии факултаи журналистика ба сифати коргардони танзим кор мекунад.
Сергей рус аст ва забони гуфтугӯии тоҷикиро аз ҳамсояву ҳамсинфон ва дӯстонаш аз худ кардааст. Дар факултаи журналистика забони тоҷикиро беҳтар аз худ намуд. Зеро, қисме аз донишҷӯён забони русиро намедонанд, бинобар ин Сергей маҷбур шуд корбурди барномаҳои танзимро бо забони тоҷикӣ ба шогирдон фаҳмонад.
“Як гурӯҳ шогирдоне, ки дар рӯзҳои аввал пеши ман барои ёд гирифтани танзими навор меоянд, ба барномаи танзим ва кори ман нигоҳ карда, шубҳа пайдо мекунанд, ки ин корро ёд мегиранд. Онҳо фикр мекунанд, ки омӯхтани он душвор аст. Ман ҳамчун дастурдиҳанда ба онҳо мефаҳмонам, ки ёд гирифтани кори танзим чи қадар барояшон муфид аст. Аммо аз 20-25 нафари ҳамагӣ 4-5 нафар ба стдия меоянду халос.”, — мегӯяд Сергей Тютин.
Сергей Тютин ба ҷуз танзим, наворбардориро низ ёд медиҳад. Аксари донишҷӯён идеяи сужаву барномаҳои худро маҳз бо Сергей муҳокимаву баррасӣ менамоянд.
Анӯшервон Амонзода ва Омина Зуҳурова аз шогирдони фаъоли Сергей ҳастанд. Онҳо дар студия барномаҳои муаллифӣ доранд ва бо роҳнамоии устодашон онро танзим мекунанд.
“Мо корро аз насби барномаҳо барои танзими навор ва овоз оғоз мекунем. Сипас чанд бор ба шогирдон ман қайчӣ кардану васли кадр, дуруст кардани овоз ва иваз кардани фонро нишон медиҳам. Онҳо чизҳои даркориро ба худ қайд мекунанд. Баъдан, бо назорати ман худашон чунин амалҳоро иҷро мекунанд.” – иттилоъ медиҳад Сергей.
Ба бовари Сергей, донишҷӯ ба ҷуз кори эҷодӣ, танзиму наворро ёд гирад, муваффақияти ӯст.
Файзуллохон Обидов
