Аз «Дараи Камароб», «Ҷон додаракам», “Алла” ва даҳҳо суруди мондагор маҳсули эҷоди Акашариф Ҷӯраев, Ҳофизи халқии Тоҷикистон ҳастанд. Суруду таронаҳои ӯ то ҳол вирди забони мардум ҳастанд ва аз ҷониби сарояндагони зиёди кишвар ва хориҷӣ бозхонӣ мешаванд.
Сароянда ва ромишгари машҳури тоҷик АКашариф Ҷӯраев яксаду сисола шуд. Ба ин муносибат дар шаҳри Душанбе конфронси байналмилалии илмӣ баргузор гардид.
Нуздаҳуми июн дар толори маҷлисгоҳи Академияи миллии илмҳои Тоҷикистон конфронси байналмилалии илмӣ таҳти унвони «Акашариф Ҷӯра ва масоили мубрами эҷодиёти шеърӣ-мусиқии тоҷик: дирӯз ва имрӯз» баргузор гардид.
Дар маросими ифтитоҳи конфронс роҳбарияти Академияи миллии илмҳои Тоҷикистон, Намояндаи Дастгоҳи иҷроияи Президент, муовини аввали вазири фарҳанг, олимону муҳаққиқон, мусиқишиносон ва аҳли фарҳанг аз Тоҷикистон ва кишварҳои хориҷӣ иштирок намуданд.
Президенти Академияи миллии илмҳои Тоҷикистон, академик Қобилҷон Хушвахтзода зимни суханронии худ таъкид кард, ки омӯзиш ва муаррифии мероси мусиқии миллӣ барои ҳифзи ҳувияти фарҳангии миллат аҳамияти бузург дорад.
Бахши хоси ҳамоиш ба зиндагӣ ва фаъолияти эҷодии Акашариф Ҷӯра бахшида шуда буд. Иштирокчиён нақши ӯро ҳамчун устоди мусиқии мардумӣ, тарғибгари мероси мусиқии тоҷик арзёбӣ намуданд.
Дар конфронс олимону муҳаққиқон аз Тоҷикистон, Ӯзбекистон ва Фаронса ва дигар коршиносон маърӯзаҳои илмӣ ироа карданд.
ПИСАНД ОМАД? БО ДӮСТОНИ ХУД МУБОДИЛА КУНЕД!
+1
5
+1
7
+1
+1
+1
+1
+1
