Нахуствазири Британияи Кабир Кир Стармер эълон кардааст, ки ҳукумат ният дорад истифодаи шабакаҳои иҷтимоиро барои кӯдакон ва наврасони то 16-сола маҳдуд ё манъ намояд. Ба гуфтаи ӯ, чунин платформаҳо ҷавононро ба муҳтавои хатарнок рӯ ба рӯ мекунанд ва бо усулҳое тарҳрезӣ шудаанд, ки вобастагӣ ба истифодаи онҳоро зиёд месозанд.
Тибқи тарҳи пешниҳодшуда, маҳдудият ба шабакаҳои маъруф, аз ҷумла TikTok, Instagram, Facebook, Snapchat, YouTube ва X татбиқ хоҳад шуд. Дар айни замон, хадамоти паёмрасонӣ ба мисли WhatsApp аз доираи қонун хориҷ хоҳанд монд.
Ҳукумати Британия умедвор аст, ки қонуни нав то охири соли ҷорӣ қабул гардида, аз моҳҳои аввали соли оянда ба иҷро дарояд. Ин иқдом пас аз таҷрибаи Автсралия амалӣ мешавад, ки моҳи декабри соли гузашта аввалин кишваре гардид, ки истифодаи шабакаҳои иҷтимоиро барои шахсони то 16-сола манъ кард. Ба иттилои расонаҳо, Канада низ ахиран чунин маҳдудиятҳоро ҷорӣ намудааст.
Ин дар ҳолест, ки муассиси паёмрасони Telegram Павел Дуров аз ин тасмим интиқод карда, гуфтааст, ки кӯдакон барои давр задани маҳдудиятҳо эҳтимолан ба истифодаи VPN рӯ меоранд ва ба муҳтавои ғайриқонунӣ ё хатарноктар дастрасӣ пайдо мекунанд.
Тибқи тарҳи қонуни нав, ҳамаи истифодабарандагони шабакаҳои иҷтимоӣ дар Британия бояд синни худро тасдиқ кунанд. Барои ин метавонанд ҳуҷҷати тасдиқкунандаи шахсият, скани чеҳра ё маълумоти корти бонкиро пешниҳод намоянд. Ин қисмати қонун низ баҳсҳои зиёдеро дар бораи ҳифзи маълумоти шахсӣ ва озодии рақамӣ ба миён овардааст.
Коршиносон бар ин назаранд, ки баҳс миёни таъмини амнияти кӯдакон ва ҳифзи ҳуқуқу озодиҳои рақамӣ дар солҳои наздик яке аз мавзӯъҳои асосии сиёсати интернетӣ дар ҷаҳон хоҳад буд.
