Дар истироҳатгоҳи «Шоҳин»-и шаҳри Гулистон Форуми XI байналмилалии фарҳангию маърифатии «Кӯдакони Иттиҳод» ба кори худ оғоз кард. Ин чорабинӣ бори аввал дар Тоҷикистон баргузор шуда, то 24 июн дар вилояти Суғд ва шаҳри Душанбе идома меёбад. Дар форум беш аз 100 нафар кӯдакону наврас аз 9 кишвари аъзои Иттиҳоди Давлатҳои Мустақил иштирок доранд. Намояндагони Озарбойҷон, Арманистон, Беларус, Қазоқистон, Қирғизистон, Тоҷикистон, Ӯзбекистон, Русия ва Туркманистон дар ин ҳамоиши байналмилалӣ ҳузур доранд. Ба гуфтаи намояндагони соҳаи маорифи вилояти Суғд, ҳадафи асосии форум таҳкими муколамаи фарҳангӣ, густариши ҳамкориҳо ва рушди муносибатҳои дӯстона миёни наврасони кишварҳои ИДМ мебошад. Дар доираи барнома иштирокчиён бо таърих, фарҳанг ва анъанаҳои миллии давлатҳои иштирокчӣ шинос шуда, дар олимпиадаҳои зеҳнӣ, вохӯриҳо бо варзишгарони машҳур, машғулиятҳои омӯзишӣ, сафарҳои сайёҳӣ ва марафонҳои гуногун ширкат хоҳанд кард. Маросими расмии ифтитоҳи Форум дар Қасри Арбоб баргузор гардид ва иштирокчиён аз ин ёдгории таърихӣ боздид намуда, инчунин паёми табрикии Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалиро шуниданд. Тибқи иттилои созмондиҳандагон, дар доираи форум баргузории беш аз 30 чорабинии фарҳангӣ, маърифатӣ ва фароғатӣ ба нақша гирифта шудааст. Ёдовар мешавем, ки Форуми байналмилалии «Кӯдакони Иттиҳод» аз соли 2013 инҷониб дар кишварҳои гуногуни ИДМ, аз ҷумла Қирғизистон, Русия, Ӯзбекистон ва Беларус баргузор мешавад.
Акси матлаб аз сомонаи majmilli.tj
