Додгоҳи ноҳияи Тагани шаҳри Маскав паёмрасони Telegram-ро барои худдорӣ аз ҳазфи маълумот 3,8 миллион рубл ҷарима баст.
Тибқи иттилои додгоҳ, Telegram барои ҳазф накардани муҳтавои дорои хусусияти ифротгароӣ ва маълумоте, ки метавонад ба ноболиғон хатар эҷод кунад, ба ҷавобгарии маъмурӣ кашида шудааст.
Додгоҳ гуфтааст, ки муҳтавои барои кӯдакон хатарнокро Оҷонсии федералии корҳои ҷавонони Русия (Росмолодёжь) ошкор намуда, баъдан ба Роскомнадзор муроҷиат кардааст.
Пеш аз ин, рӯзи 27 май, ҳамин додгоҳ Telegram-ро барои ҳазф накардани муҳтавои ифротгароӣ 7 миллион рубл ҷарима карда буд. Инчунин, рӯзи 12 май Telegram барои ҳазф накардани муҳтавои мамнуъ боз 3,8 миллион рубл ҷарима шуда буд. Рӯзи 5 май низ додгоҳ ба ҳамин асос нисбат ба ширкат ҷаримаи 7 миллион рубл таъйин карда буд.
Ҳамин тариқ, танҳо дар давоми як моҳи охир нисбат ба Telegram дар Русия чандин қарори ҷаримабандӣ барои иҷро накардани талаботи марбут ба ҳазфи муҳтавои мамнуъ ва ифротгароёна қабул шудааст.
