Парвариши шутур яке аз лоиҳаҳои Маркази табобатии “Осуда” аст. Ин шутурҳо барои он нигаҳдорӣ мешаванд, ки табобатгирандагони табобатгоҳ тавонанд аз шири онҳо нӯши ҷон кунанд.
Холаи Зебохон шутурҳоро медӯшаду ба муштариён шир пешниҳод мекунад. Ӯ мегӯяд, шири шутур ба як қатор бемориҳо фоида дорад…
Ахиран Кумитаи иттифоқи касабаи кормандони фарҳанг, иттилоот, варзиш ва сайёҳии Тоҷикистон як гурӯҳ аз намояндагони аъзои худро барои шиносоӣ ба Маркази табобатии “Осуда” роҳнамоӣ кард то аз наздик ба имкониятҳои ин марказ ошно шаванд.
Маркази табобатии “Осуда” дорои 80 кат буда, ҳуҷраҳои дунафара сенафара ва чаҳорнафара дорад. Ин марказ дар маҳаллаи 5-уми шаҳри Турсунзода ҷойгир аст.
Хизматрасонҳои ин марказ аз муоинаи духтур оғоз мешавад. Маҳси обӣ ё гидромассаж, парафинотерапия, йодотерапия, физиотерапия, сузандармонӣ, маҳс барои мардон ва занон, дастгоҳи кашиши миён, ғори намак ё галотерапия аз имкониятҳои табобатии марказ ҳастанд.
Онҳое, ки мехоҳанд дар ҳуҷраҳои дунафара ҷой гиранд, барои ҳар рӯз 250 сомонӣ пардохт мекунанд. Ба ин маблағ се вақт хурок ва тамоми табобати Маркази табобатии “Осуда” шомил аст. Арзиши ҳуҷраҳои 3-нафара ва 4-нафара барои як нафар 200 сомонӣ аст.
Ҳамчунин таботатгирандагони Маркази табобатии “Осуда” метавонанд аз хизматрасониҳои Маркази ташхисию табобатии Саномед истифода кунанд. Ҳатто барои таҳлили озмоишҳо мутахассисони Саномед ба Маркази табобатии “Осуда” рафта аз табобатгирандагон онро мегиранд.
Шуъбаи ташхисии маркази Саномед бо таҷҳизотҳои муосири замонавӣ, аз қабили дастгоҳи ултрасадо, томографияи магнитӣ, рентгени рақамӣ ва инчунин дастгоҳҳои дигари табобатӣ муҷаҳҳаз аст.
