Як мард аз иёлати Одишаи Ҳиндустон пайкара ё склети хоҳари фавтидаашро аз қабр бароварда, ба бонк бурд то марги ӯро собит карда, маблағро аз ҳисоби бонкияш гирад.
Мард Ҷиту Мунда иддао кардааст, ки кормандони бонк пайваста аз ӯ талаб мекарданд, ки соҳиби ҳисобро биёрад, гарчанде ӯ онҳоро аз марги хоҳараш огоҳ карда буд.
Ҳодиса дар филиали Маллипоси Бонки маҳаллии Одиша дар минтақаи Патана рух додааст. Ҷиту Мундаи 50-сола аз ҳисоби хоҳари марҳумаш 20 ҳазор рупияро бояд мегирифт.
Хоҳарбузургаш Калра Мундаи 56-сола 26 январи соли 2026 вафот кардааст. Ҷиту баъди чандин маротиба муроҷиат ба бонк, ноумед шуда, ба иқдоми шадид даст задааст.
Ӯ гуфтааст, ман чандин бор ба бонк рафтам ва кормандон ба ман гуфтанд, ки соҳиби ҳисобро биёрам. Гарчанде ман гуфтам, ки ӯ фавтидааст, онҳо гӯш накарданд… бинобар ин, ман қабрро кофта, скелетро ҳамчун далел овардам.
Пулиси Патана гуфтааст, Ҷиту бесавод буда, кормандони бонк натавонистанд тартиби гирифтани пул аз ҳисоби шахси фавтидаро ба ӯ фаҳмонанд ва маҳз ҳамин ҳолат боиси чунин нофаҳмии ҷиддӣ шудааст.
Пулис баъди огоҳӣ ба бонк омада, фавран дахолат кардааст.
Мақомот ба Ҷиту итминон доданд, ки ба ӯ дар анҷоми расмиёти гирифтани пул аз ҳисоби шахси фавтида бо роҳҳои қонунӣ кумак мекунанд.
Ин ҳодиса баҳси васеъро дар бораи саводнокии молиявӣ дар Ҳиндустон ва тарзи муоширати муассисаҳо бо гурӯҳҳои осебпазир ба миён овардааст.
Гарчанде бонкҳо барои гирифтани маблағ аз ҳисоби шахси фавтида расмиёти қатъӣ доранд, аз ҷумла тасдиқи вориси қонунӣ ва ҳуҷҷатҳои зарурӣ, набудани шарҳи равшан метавонад мардумро овора намояд.
