Баҳодур Усмонов ғолиби мусобиқаи байналмилалӣ дар Қазоқистон шуд. Дар мусобиқа зиёда аз 70 варзишгар аз Қазоқистон, Туркия, Русия, Ӯзбекистон, Қирғизистон ва Тоҷикистон ширкат карданд.
Муштзани тоҷик Баҳодур Усмонов ғолиби мусобиқаи байналмилалӣ гардид. Усмонов дар вазни то 57 килограмм дар мусобиқае, ки ба хотираи асосгузори бокси Қазоқистон Шоқир Болтекули бахшида шуда буд, дар даври ниҳоӣ боксчии қазоқ Ертуған Зейнуллиновро мағлуб кард.Ин шашумин медали Баҳодур Усмонов дар мусобиқаҳои байналмилалӣ мебошад. Ӯ қаблан қаҳрамони Осиё шуда, инчунин дар дигар мусобиқаҳо ду медали тилло, як медали нуқра ва як медали биринҷӣ ба даст овардааст.
Ахиран Хусравхон Раҳимов дар чемпионати ҷаҳон оид ба бокс, ки дар Амороти Муттаҳидаи Араб баргузор мешавад, ба финал роҳ ёфт.
Дар ин мусобиқа 548 варзишгар аз 118 кишвар дар 13 вазн рақобат мекунанд. Хусравхон Раҳимов дар вазни то 57 кг ҳунарнамоӣ намуд.
