Гурӯҳи «ZANJABIL BRO» тавонист дар ҳаҷви тоҷик навоварӣ кунад. Мавзӯҳои пешниҳоднамудаи гурӯҳ наву ҷолиб, кори танзими видеоҳояшон дар сатҳи олист…
Матеош, ки идеяи таъсиси гурӯҳи ҳаҷвиро бо дӯстонаш дар миён гузоштааст, шарҳ медиҳад, ки Маънои ZanjabilBRO – муҳтавои тунд ва бародари тунд аст.
Замоне Фред и Матеош (ду чеҳраи асосии гурӯҳи «ZANJABIL BRO») брейк-данс машқ мекарданд ва номи гурӯҳашон “Zanjabil крю” буд. Вақте ба ҳаҷв рӯй меоранд, сари чӣ ном гузоштани гурӯҳ баҳс мекунанд. Матеош пешниҳод мекунад, ки «Занҷабил (қаламфур) бошад.
Онҳо мегӯянд, қаламфур тунд буда, ҳама наметавонад онро истеъмол намояд. Ҳамчунин на ҳама шухию ҳаҷви онҳоро дарк мекунад…
Ҳоло ба назар чунин менамояд, ки дигар гурӯҳои ҳаҷвии мо дар қиёс бо гурӯҳи «ZANJABIL BRO» то андозае куҳнаанд. «Ин гурӯҳ масоили ҷавонон, фарҳанг ва тафаккури умдатан мардуми шаҳрро зебову диданӣ ва хеле ҳунармандона пешниҳод менамояд.
Идеядуздӣ намекунанд ё мисли баъзе гурӯҳҳои ҳаҷвии дигар латифаҳои русиро баргардон карда бозӣ намекунанд. Саҳнаҳои ин гурӯҳ ғайри қобили пешбинӣ аст, чун нав ва дастнохӯрдаанд.
Онҳо 7-уми майи соли 2019 аввалин видеои худро дар саҳифаи Инстаграм нашр карданд. Он кори на он қадар ҷиддӣ вале барояшон як имтиҳон буд, ки мардум ба кори онҳо чӣ гуна баҳо медиҳад… Хушбахтона, ҷомеа онҳоро хуш пазируфт. Ҳоло дар Инстаграм 146 ҳазор обуначӣ доранд ва наворҳои онҳоро беш аз 200 ҳазор бинанда пайгирӣ мекунад.
То ду соли пеш аксари саҳнаҳои онҳо тариқи телефон сабт мешуд. Ҳоло онҳо соҳиби камера ва мизи танзим ҳастанд.
Салоҳиддини Айнидин
