Коррупсия яке аз монеаҳои ҷиддии рушди устувор, адолати иҷтимоӣ ва эътимоди шаҳрвандон ба давлат аст. Барои мубориза бо он танҳо иқдомҳои сохторҳои давлатӣ кофӣ нестанд, ҷомеаи шаҳрвандӣ, ВАО ва худи шаҳрвандон нақши калидӣ доранд. Аз сатҳи таҳқиқи мустақилонаи рӯзноманигорон то ташаккули фарҳанги зиддикоррупсионӣ ҳамаи ин унсурҳо ба коҳиши сатҳи фассод мусоидат мекунанд.
Ахиран Агентии назорати давлатии молиявӣ ва мубориза бо коррупсияи Тоҷикистон аз ҷомеаи шаҳрвандӣ даъват намуд, ки муҳлати Нақшаи чорабиниҳои амалисозии Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030 барои марҳилаи якум (солҳои 2021-2025) ба итмом мерасад ва лоиҳаи Нақшаи чорабиниҳои амалисозии Стратегия барои марҳилаи дуюм (солҳои 2026-2030) аз тарафи гуруҳи корӣ мавриди таҳия қарор дорад.
Ин ниҳод таъкид намуда буд, ки «бо мақсади паст кардани шиддати коррупсия, андешидани чораҳои муассири зиддикоррупсионӣ, баланд бардоштани сатҳи некуаҳволии сокинон ва пешрафти тамоми соҳаҳои кишвар аз шаҳрвандон даъват ба амал оварда мешавад, ки таклифҳои худро вобаста ба Нақшаи чорабиниҳои амалисозии Стратегия барои марҳилаи дуюм (солҳои 2026-2030) то санаи 1 ноябри соли 2025 унвонии Агентии назорати давлатии молиявӣ ва мубориза бо коррупсияи Тоҷикистон пешниҳод намоянд.»
Имрӯз мо дар бораи он суҳбат мекунем, ки ҷомеаи шаҳрвандӣ чӣ гуна метавонад ба баланд бардоштани шаффофият, ҳисоботдиҳӣ ва назорати ҷамъиятӣ мусоидат кунад, шаҳрвандон чӣ гуна метавонанд дар ин раванд иштирок намоянд ва чаро муборизаи дастаҷамъӣ бо коррупсия барои давлатдорӣ ва рушди кишвар ҳаётан муҳим аст. Ҳамсуҳбатони мо Алиакбар Абдуллоев, фаъолии ҷомеаи шаҳрвандӣ ва роҳбари ТҶ «Маркази тарғиб ва ташаккули маърифати зиддикоррупсионӣ” ва Давлатмурод Каримов, рӯзноманигор ва филмноманавис ҳастанд.
