Маъмурияти президенти Амрико Доналд Трамп чандин гузинаҳои ҳамла ба Венесуэларо тарҳрезӣ кардааст.
Маъмурияти президенти ИМА Доналд Трамп ҳадди ақал се гузинаи амалиёти низомӣ дар қаламрави Венесуэларо коркард намудааст, аз ҷумла ҳамлаи мустақим. Ба навиштаи The New York Times, кормандони дастгоҳи президент ҳоло бо Вазорати адлия машварат мекунанд, то асоси ҳуқуқии амалиётҳои дар назардоштаро таъмин намоянд.
Яке аз гузинаҳои мавриди баррасӣ ҳадафи объектҳои низомӣ мебошад, ки марбут ба ҳимояи президенти Венесуэла Николас Мадуроанд. Ин иқдом метавонад Мадуроро водор созад, ки кӯшиши фирор намояд. Гузинаи дуввум ирсоли гурӯҳҳои махсус барои куштори Мадуро-ро пешбинӣ мекунад. Гузинаи сеюм ирсоли неруҳои амрикоӣ барои тасарруфи пойгоҳҳои ҳавоӣ ва қисме аз маъданҳои нафтии Венесуэла-ро дар бар мегирад.
Ҳамчунин номбар шудааст, ки асоси ҳуқуқии иҷрои ин сенарияҳо метавонад иддао бошад, ки «Мадуро ва кормандони баландмақоми хадамоти амниятиашон ҳоло шахсони марказӣ дар «Cartel de los Soles» мебошанд», ки маъмурияти президенти ИМА онро ҳамчун созмони террористӣ эътироф кардааст.
Нашрия меафзояд, ки президент Трамп ҳанӯз ҳеҷ қарореро «дар бораи он ки чӣ гуна ва оё бояд амал кард» қабул накардааст. Пешниҳоди қарор, ба навиштаи NYT, метавонад бо омадани киштии «Gerald R. Ford» дар миёнаҳои ноябр ва ҳузури тақрибан 5 ҳазор маллоҳ ва беш аз 75 ҳавопаймои ҳамлавар, шиносоӣ ва ёрирасон, аз ҷумла ҳавопаймоҳои ҷангии F/A-18, иртибот дошта бошад.
