Ҷаред Айзекман, дӯсти Маск роҳбарии NASA-ро ба уҳда мегирад. Президенти ИМА Доналд Трамп эълон кард, ки дубора номзадии Ҷаред Айзекман, кайҳоннавард ва дӯсти миллиардер ва муассиси SpaceX — Илон Маск-ро ба мақоми роҳбари NASA пешниҳод кардааст. Ин иқдом пас аз панҷ моҳ аз лаҳзае сурат гирифт, ки номзадии аввалини Айзекман бозпас гирифта шуда буд.
Айзекман — соҳибкори соҳаи тиҷорати электронӣ ва кайҳоннаварди хусусӣ аст, ки ду маротиба ба мадори Замин парвоз кардааст. Номзадии ӯ барои роҳбарии NASA баъд байни Трамп ва Маск ихтилофи шадид сар зад. Дар моҳи июл, Шон Даффи, роҳбари Вазорати нақлиёти ИМА, муваққатан иҷрокунандаи вазифаи сарвари NASA таъин гардид.
Бозгашти Айзекман ҳамчун номзади нави Трамп ба ин вазифа тақрибан ду ҳафта пас аз изҳороти Даффи рух дод, ки гуфт ширкатҳои дигар низ метавонанд барои қарордоди асосии NASA оид ба фуромадани одам ба Моҳ рақобат кунанд. Ин изҳорот боиси баҳси ошкоро байни Даффи ва Маск гардид, ки кадом ширкат бояд ин масъулиятро иҷро кунад.
Маск дар посух ба хабарҳо дар шабакаҳои иҷтимоӣ навишт:
«Касе, ки масъули барномаи кайҳонии Амрико аст, набояд IQ-и дурақама дошта бошад».
Трамп дар паёми худ дар шабакаҳои иҷтимоӣ навишт:
«Имшаб ман бо ифтихор номзадии Ҷаред Айзекман — роҳбари бомуваффақият, хайрхоҳ, пилот ва кайҳоннавард — ро барои мақоми роҳбари NASA пешниҳод мекунам».
Ин вазифа бояд аз ҷониби Сенати ИМА тасдиқ карда шавад, ки ҳоло дар он Ҳизби Ҷумҳурихоҳи Трамп аксариятро ташкил медиҳад.
Айзекман аз президент изҳори сипос намуда, гуфт, ки мехоҳад «бо шараф ба кишвар хизмат кунад». Ӯ 12 сентябри соли 2024 ҳангоми мисссияи Polaris Dawn, дар баландии тақрибан 700 километр аз сатҳи Замин, аввалин шахси хусусӣ гардид, ки ба фазои кушод баромад.
