Беш аз 1000 гол ва се унвони қаҳрамонии ҷаҳон: чӣ гуна Пеле Подшоҳи футбол шуд. Агар имрӯз зинда мебуд, синаш ба 85 мерасид. пуррБа ҳамлагари афсонавии Бразилия Пеле 85-сола мешуд.
Ин бозигар 29 декабри соли 2022 ин ҷаҳонро тарк кард… 23 октябри соли 1940 яке аз бузургтарин ситораҳои таърихи футбол Эдсон Арантес ду Насименту маъруф бо номи Пеле ба дунё омад. Ӯ хеле барвақт тахаллуси ифтихории «Шоҳи футбол»-ро гирифт.
Пеле дар оилаи футболбоз ба дунё омада, устоди аввалини ӯ падараш Дондино буд. Ӯро ба шарафи ихтироъкори амрикоӣ Томас Эдисон ном гузоштанд, вале бо сабаби иштибоҳи ҳуҷҷатгузорӣ номи ӯ Эдсон сабт гардид.
Дар ҳафтсолагӣ Эдсон ба тими мактабӣ ҳамроҳ шуд ва зуд ба яке аз бозингарони беҳтарин табдил ёфт. Дар ҳамин давра лақаби “Пеле” пайдо шуд, маҳфуме, ки маънояшро ҳатто худи ӯ намедонист.
Дар 15-солагӣ мураббии ӯ Валдемар де Брито, ки собиқ бозигари тими миллии Бразилия буд, ӯро ба клуби «Сантос» тавсия дод. Маҳз аз ин ҷо роҳи Пеле ба сӯи муваффақият оғоз ёфт.
Пеле дар 16-солагӣ ба тими миллии Бразилия даъват шуд. Дар Ҷоми ҷаҳон-1958 дар Шветсия ӯ танҳо 17-сола буд, вале бо 6 гол, аз ҷумла хет-трик дар нимфинал ва ду гол дар финал, Бразилияро ба аввалин унвони ҷаҳонии худ бурд.
Пеле дар се Ҷоми ҷаҳон (1958, 1962, 1970) ғолиб омад то ҳол ягон бозингар ба чунин дастоварди таърихӣ ноил нашудааст.
Соли 1970 ӯ роҳбари тими афсонавии Бразилия буд, ки то имрӯз яке аз беҳтаринҳо дар таърихи футбол дониста мешавад.
Рекордҳо ва дастовардҳо:
- Беш аз 1000 гол дар 1116 бозӣ барои «Сантос»
- Се қаҳрамонии ҷаҳон, рекорди беназир барои як бозингар.
- 92 хет-трик дар карера, бештар аз Роналду ва Месси.
- Ҷавонтарин голзан дар таърихи Ҷоми ҷаҳон (17 солагӣ).
- Ду бор ғолиби Ҷоми Либертадорес ва ду бор соҳиби Ҷоми байниқитъавӣ.
- Дар соли 1970 — беҳтарин бозигари ҷаҳон.
Пас аз анҷоми фаъолияти касбӣ дар Бразилия, Пеле барои баланд бардоштани обрӯи футбол ба ИМА рафт ва бо клуби «Ню-Йорк Космос» шартнома баст. Ӯ соли 1977 қаҳрамони ИМА гардид ва ба рушди футболи амрикоӣ саҳми бузург гузошт.
Пеле бо сабаби саҳм ва шӯҳрати бемислаш аз ҷониби ФИФА ва Федератсияи байналмилалии таърих ва оморҳои футбол беҳтарин бозигари асри XX эълон шуд.
Гарчанде ки рекордҳои голҳои ӯ баъдтар аз ҷониби Роналду ва Месси шикаста шуданд, Пеле ҳамоно рамзи серталош барои миллионҳо кӯдак дар тамоми ҷаҳон боқӣ мондааст.
