Тим Кук, Директори генералии ширкати Apple изҳор доштааст, ки болоравии нархи моделҳои нави iPhone бо тарофаҳои президенти Доналд Трамп ҳеҷ иртибот надорад. Дар ин бора нашрияи CNBC хабар медиҳад.
«Болоравии нарх бо сабаби тарофаҳо нест.», – гуфтааст Кук. Ин яке аз аввалин изҳоротест, ки дар он Кук ба таври қатъӣ робитаи эҳтимолии тарофаҳои Трамп бо нархи iPhone-ро шарҳ медиҳад.
Моҳи ҷорӣ Apple нархи моделҳои iPhone 17 Pro ва 17 Pro Max-ро 100 доллар боло бурд, вале арзиши модели асосиро бетағйир нигоҳ дошт. Ширкат ҳамчунин модели Air-ро муаррифӣ кард, ки ҷойгузини Plus аст.
Бо мақсади давр задани боҷҳо, Apple занҷираи таъминоти худро бозсозӣ кардааст. Ҳоло ширкат iPhone-ҳоро аз кишварҳое ба ИМА ворид мекунад, ки тарофаҳои пасттар доранд, ба монанди Ҳиндустон ва Ветнам, на аз Чин, ки маркази анъанавии истеҳсоли он ба ҳисоб мерафт.
