Конгресси ИМА беш аз 30 ҳазор саҳифа маводҳои марбут ба парвандаи Эпштейнро нашр кард. Ифшои ин ҳуҷҷатҳоро ҷумҳурихоҳон низ талаб доштанд. Дар байни ҷонибдорони нашри онҳо миллиардер Илон Маск ҳам буд, ки дар авҷи баҳсаш бо Трамп дар шабакаи иҷтимоии X навишт, ки дар «рӯйхати Эпштейн» номи президенти ИМА низ ҳаст. Баъдтар ӯ паёмро ҳазф карда иқрор шуд, ки шитобкорӣ намудааст, аммо ҳамоно исрор дошт, ки санадҳо бояд нашр шаванд.
The Wall Street Journal хабар додааст, ки номи Трамп дар парвандаи Эпштейн зикр шудааст.
Кумитаи назоратии Палатаи намояндагони Конгресси ИМА беш аз 33 ҳазор саҳифа ҳуҷҷатҳои парвандаи сармоягузори маъруф Ҷеффри Эпштейнро нашр кард. Эпштейн барои ҷиноятҳои шаҳвонӣ маҳкум шуда буд ва 2019 дар зиндон худкушӣ кард.
Маводҳоро Вазорати адлияи ИМА пешниҳод кардааст. Онҳо аз ҳуҷҷатҳои судӣ, маълумот дар бораи парвозҳо, сабтҳои камераҳои назоратӣ дар зиндон, шаҳодатҳо ва дигар далелҳо иборат мебошанд.
Ҳоло маълум нест, ки чӣ қадар иттилооти муҳим дар ин санадҳо ҷой дорад.
