Incibe, Институти миллии амнияти сайберии Испания аз шакли нави дуздии маълумоти шахсӣ огоҳ мекунад. Ҳакерҳо барои рахна кардани аккаунтҳо ва гирифтани пул аз зангҳои видеоии WhatsApp истифода мебаранд.
Ҳакерҳо бо истифода аз зангҳои видеоӣ тавассути WhatsApp метавонанд аккаунти шуморо дуздида, худро ба ҷои шумо муаррифӣ намоянд ва аз номи шумо аз дигарон пул талаб кунанд.
Ҷинояткорон тавассути WhatsApp занг зада, худро ҳамчун шахсе аз рӯйхати тамосҳо муаррифӣ мекунанд. Ҳангоми ҷавоб додан корбар танҳо экрани сиёҳ мебинад. Зангзананда аз ҷабрдида хоҳиш мекунад, ки экрани телефони худро мубодила кунад, то гӯё мушкили экранро ҳал намояд.
Дар ҳамин вақт, ба ҷабрдида одатан паёми SMS бо рамзи тасдиқи WhatsApp меояд, ки ҳангоми мубодилаи экран нохост намоиш дода мешавад. Ҷинояткор аз фурсат истифода бурда, рамзро сабт мекунад ва аккаунтро рахна намуда, ба соҳиби аслӣ дигар дастрасӣ ба чатҳояш намегузорад.
Баъд аз ин, ҷинояткор ба тамосҳои ҷабрдида паёмҳо фиристода, аз онҳо пул талаб мекунад.
