Amazon ва Google барои фароҳамсозии имконоти «бараҳнасозии» занон тавассути зеҳни сунъӣ муттаҳам мешаванд.
Саноати бисёрмиллиондоллара, ки бо ёрии зеҳни сунъӣ тасвирҳои сохтаи бараҳнаи занонро эҷод мекунад, ба таври васеъ аз серверҳо ва хадамоти технологӣ аз ҷониби ширкатҳои бузурги Google ва Amazon истифода мебарад. Дар бораи ин натиҷаҳо ширкати таҳқиқотии Indicator гузориш додааст.
Таҳлили 85 платформаро, ки Indicator анҷом додааст, нишон медиҳад, фаъолияти онҳо бо хадамотии абрии Amazon, шабакаҳои паҳнкунии муҳтаво (CDN) аз Cloudflare ва низомҳои бақайдгирии Google таъмин мегардад. Ин пуштибонӣ имкон медиҳад, ки як соҳаи пинҳонии саноат рушд ёбад, ки гардиши солонаи он, ба ҳисобҳои таҳқиқотгарон, метавонад ба 36 миллион доллар расад. Вале даромадҳои воқеии операторҳо метавонанд боз ҳам зиёдтар бошанд, зеро онҳо дар дигар платформаҳо, масалан, Telegram, фаъолият мекунанд.
Гарчанде намояндагони ширкатҳои бузурги IT гуфтаанд, ки чораҳои зидди чунин қонуншиканӣ меандешанд,аммо ин хадамотҳо то ҳол фаъоланд ва ба усулҳои мураккаби канорагирӣ аз маҳдудсозӣ рӯ меоранд. Операторҳо доменҳои сохта ва URL-ҳои пинҳонӣ истифода мебаранд, то ҳангоми сабти ном бо ҳисоби Google ё Apple аз филтрҳои автоматӣ гузаранд.
